भ्रमणका क्रममा सोमबार राष्ट्रपति कार्यालयमा विशेष समारोह आयोजना हुँदैछ । समारोहमा राष्ट्रपति रामचन्द्र पौडेलले भारतीय प्रधानसेनापति सेठलाई नेपाली सेनाको मानार्थ महारथीको दर्ज्यानी चिह्न प्रदान गर्ने कार्यक्रम छ ।

त्यसैगरी, भारतीय प्रधानसेनापति सेठ र नेपाली सेनाका प्रधानसेनापति सिग्देलबीच सोमबार जंगी अड्डामा द्विपक्षीय वार्ता हुनेछ । वार्तामा दुई देशबीचको सैन्य सहकार्य, तालिम तथा संयुक्त अभ्यासलगायत विषयमा छलफल हुने बताइएको छ ।

नेपाल–भारत सैन्य सम्बन्ध

नेपाल र भारतबीच लामो समयदेखि घनिष्ठ तथा ऐतिहासिक सैन्य सम्बन्ध रहँदै आएको छ । दुई देशका सेनाबीच उच्चस्तरीय भ्रमण, संयुक्त सैन्य अभ्यास तथा तालिम र अनुभव आदानप्रदान हुँदै आएको छ ।

नेपालका प्रधानसेनापतिलाई भारतीय सेनाको मानार्थ महारथी र भारतीय स्थल सेनाध्यक्षलाई नेपाली सेनाको मानार्थ महारथीको पदवी प्रदान गर्ने परम्परा सन् १९५० देखि चलिआएको छ ।

दुवै देशका सेनाप्रमुखलाई एकअर्काको सेनाको मानार्थ महारथीको पदवी प्रदान गर्ने परम्परालाई पारस्परिक सम्मान र दुई देशबीचको मैत्रीपूर्ण सम्बन्धको प्रतीकका रूपमा लिइन्छ । यसले नेपाल–भारत सैन्य साझेदारीलाई थप सुदृढ बनाउने अपेक्षा गरिएको छ ।