नेपाल अटोमोबाइल्स इम्पोर्टर्स एण्ड म्यानुफ्याक्चरर्स एसोसिएसन (नाइमा)ले आयोजना गरेको ‘प्रतिभा भित्र्याउने र कामदार बाहिर पठाउने : प्रक्रियामार्फत नेपालमा शिक्षा, सीप र उद्यमशीलताको खाडल पुर्ने’ विषयक संवादमा बोल्दै सेढाइले नेपालमै गुणस्तरीय शिक्षा, सीप विकास र रोजगारीका अवसर सिर्जना गर्न सकिने बताइन् ।

उनले नेपालमा खुलेका शैक्षिक कन्सल्टेन्सीहरूले ‘नेपालमा केही हुँदैन, विदेश गएपछि मात्रै अवसर पाइन्छ’ भन्ने भाष्य निर्माण गरिरहेको दाबी गरिन् । नेपालमा सम्भावना हुँदाहुँदै पनि युवालाई निराश बनाउने वातावरण निर्माण भइरहेको उनको भनाइ छ ।

उद्योगको आवश्यकताअनुसार पाठ्यक्रम आवश्यक

सेढाइले विश्वविद्यालयले उद्योग तथा व्यवसायीको आवश्यकताबारे पर्याप्त छलफल गरेर पाठ्यक्रम निर्माण गर्नुपर्ने बताइन् ।

नेपालमा उद्योगलाई आवश्यक पर्ने जनशक्तिबारे उद्योगी तथा व्यवसायीसँग छलफल गरेर पाठ्यक्रम निर्माण गर्न नसकिएको स्वीकार गर्दै उनले यसमा शैक्षिक क्षेत्रले कमजोरी गरेको बताइन् ।

‘नेपालमा भएका उद्योगलाई कस्ता जनशक्ति चाहिएको छ भनेर हामीले कोर्स बनाउनुअघि उहाँहरूलाई बोलाएर छलफल गर्न सकेनौँ । त्यसमा हामीले गल्ती गरेका छौँ भन्नुपर्छ,’ उनले भनिन् ।

उनले किताबको ज्ञान मात्रै नभई व्यवस्थापकीय, प्राविधिक र व्यावहारिक सीपयुक्त जनशक्ति उत्पादन गर्नुपर्नेमा जोड दिइन् ।

नीति कार्यान्वयनमा जोड

युवाको उद्यमशीलता र स्वरोजगार प्रवर्द्धनका लागि सरकारले नीति तथा कार्यक्रम बनाए पनि प्रभावकारी कार्यान्वयन चुनौतीपूर्ण रहेको उनले बताइन् ।

‘पोलिसी बनेको छ, प्रोग्राम बनेको छ । तर त्यो कागजमा मात्रै सीमित भयो,’ उनले भनिन्, ‘भएका नीतिमा आवश्यक परिमार्जन गरेर व्यवहारमा कार्यान्वयन गर्न सक्यौँ भने धेरै काम गर्न सक्छौँ ।’

उनले देशभर सीप विकासका कार्यक्रम विस्तार गर्न सरकार र निजी क्षेत्रलाई आग्रह गरिन् । स्थानीय तहदेखि निजी क्षेत्रसम्मले सीप विकासका कार्यक्रम सञ्चालन गर्न सके युवालाई स्वदेशमै अवसर खोज्न सहज हुने उनको भनाइ छ ।

निजी क्षेत्रलाई लगानी गर्न आग्रह

सेढाइले निजी क्षेत्रलाई पनि युवाको सीप विकासमा लगानी गर्न आग्रह गरिन् । शैक्षिक संस्था र युवालाई लक्षित गरी सीप विकासमा लगानी गर्ने व्यवसायिक घरानालाई सरकारले प्रोत्साहन गर्नुपर्ने उनले बताइन् ।

नेपालमा अवसर सिर्जना गर्न सरकार, निजी क्षेत्र, शैक्षिक संस्था र युवाबीच सहकार्य आवश्यक रहेको उनको भनाइ छ । विश्वविद्यालय, निजी क्षेत्र र सरकारबीच सहकार्यका लागि आफू प्रतिबद्ध रहेको बताउँदै उनले आफू नेतृत्वमा रहेका विभाग तथा विभिन्न क्याम्पसको सञ्जालमार्फत निजी क्षेत्रसँग सहकार्यको वातावरण बनाउन सकिने बताइन् ।