कैलाली । कैलालीको बर्दगोरिया गाउँपालिका–१ मुडा पुल नजिकै ट्रकको ठक्करबाट नेकपा एमाले सुदूरपश्चिम प्रदेश कमिटी सल्लाहकार समिति सदस्य सावित्रा सापकोटाको मृत्यु भएको छ।

सोमबार बिहान सापकोटा सवार से १–०१–००१ ख नम्बरको स्कुटरलाई ट्रकले ठक्कर दिएको प्रहरीले जनाएको छ। नवलपरासी बर्दघाटका २६ वर्षीय दिनेश गिरीले चलाएको लु १–०१–०१० प ००४५ नम्बरको ट्रकले स्कुटरलाई ठक्कर दिएको हो।

दुर्घटनामा गम्भीर घाइते सापकोटालाई तत्कालै दोदोधरा अस्पताल पुर्‍याइएको थियो। अस्पताल पुर्‍याएपछि चिकित्सकले उनलाई मृत घोषणा गरेका थिए।

इलाका प्रहरी कार्यालय बौनियाँका प्रहरी निरीक्षक डम्बर विष्टका अनुसार ट्रक चालक गिरीलाई महेन्द्र राजमार्गअन्तर्गत बर्दगोरिया र लम्कीचुहा नगरपालिकाको सीमा क्षेत्रबाट प्रहरीले नियन्त्रणमा लिएको छ।

प्रहरीले घटनाबारे थप अनुसन्धान गरिरहेको जनाएको छ।

सापकोटा २०७४ सालको स्थानीय तह निर्वाचनमा एमालेका तर्फबाट बर्दगोरिया गाउँपालिकाको उपाध्यक्ष पदमा उम्मेदवार बनेकी थिइन्। पछिल्लो समय उनी एमाले सुदूरपश्चिम प्रदेश कमिटीको सल्लाहकार समिति सदस्यका रूपमा सक्रिय थिइन्।

Originally published on abcnews.com.np.