काठमाडौं । उज्यालो नेपाल पार्टीका अध्यक्ष कुलमान घिसिङले वर्तमान सरकार गलत दिशातर्फ अघि बढिरहेको बताएका छन्।

सरकारले विद्युत्मा मूल्य अभिवृद्धि कर (भ्याट) लगाएको विरोधमा सोमबार काठमाडौंमा हस्ताक्षर अभियान सुरु गर्दै घिसिङले जनतालाई राहत दिनुपर्ने समयमा थप कर लगाएर सरकार गलत दिशामा अघि बढेको बताएका हुन्।

घिसिङले सांसदलाई दिइने सुविधा तथा राइड सेयरिङबाट आम्दानी गर्नेहरूमाथि लगाइएको करको विषयसमेत उठाए। उनले भने, “सांसदले ८० हजारभन्दा बढी लिन्छन्, उनीहरूलाई १ प्रतिशत भ्याट र राइड सेयरिङ गरेर कमाउनेहरूसँग अर्को ५ प्रतिशत भ्याट, व्यक्तिगत रूपमा अर्को १ प्रतिशत पनि भ्याट रहेछ। यी विषयमा सरकार गलत दिशातिर गयो।”

इन्डक्सन चुलो प्रयोग गर्न आग्रह

घिसिङले विद्युत् खपत बढाउन सरकारले विद्युतीय चुलोको प्रयोगलाई प्रोत्साहन गर्नुपर्ने बताए। ग्यासका लागि लामो समय लाइन बस्नुभन्दा इन्डक्सन चुलो प्रयोग गर्न उनले सर्वसाधारणलाई आग्रह गरे।

“बजार गएर इन्डक्सन किन्नुहोस्, ग्यासभन्दा सस्तो हुन्छ। अहिले विद्युत् खेर गइरहेको छ। त्यसमा सहुलियत दिनुपर्नेमा जनतालाई अझ भ्याट लगाइएको छ। मेरो बिलमा झन्डै ४०० रुपैयाँ थपिएर आएको छ,” उनले भने।

विद्युतीय चुलो प्रयोग गर्दा ट्रान्सफर्मर पड्कने भन्दै गलत अफवाह फैलाइएको उनको आरोप छ। विद्युत् खपत बढाउनुपर्ने समयमा विद्युतीय चुलोको प्रयोगलाई निरुत्साहित गर्न नहुने उनले बताए।

विद्युत् खपत बढाउनुपर्नेमा जोड

बर्खायाममा विद्युत् उत्पादन बढ्ने भएकाले बिजुली खेर जाने अवस्था रहेको उल्लेख गर्दै घिसिङले स्वदेशमै विद्युत् खपत बढाउनुपर्नेमा जोड दिए।

उनले विद्युत् प्रयोगलाई प्रोत्साहन गर्ने नीति लिनुपर्ने बताउँदै विद्युत्मा लगाइएको भ्याट तत्काल फिर्ता लिन सरकारसँग माग गरे।

Originally published on abcnews.com.np.