काठमाडौं । लामो समयदेखि समाधान हुन नसकेको डेडिकेटेड तथा ट्रंकलाइनको विद्युत् महसुलसम्बन्धी विवादप्रति निजी क्षेत्रले असन्तुष्टि जनाएको छ।

नेपाल विद्युत् प्राधिकरणको ४१औँ वार्षिकोत्सवका अवसरमा नेपाल उद्योग वाणिज्य महासंघका अध्यक्ष अन्जन श्रेष्ठले १० वर्षसम्म पनि डेडिकेटेड तथा ट्रंकलाइनको बक्यौता विवाद समाधान हुन नसक्नु मुलुकको कार्यक्षमतामाथि प्रश्न भएको बताए।

उनले भने, “एउटा समस्या १० वर्षसम्म समाधान हुँदैन । मुलुकको इफिसेन्सी खोइ ? यसलाई समयमा समाधान गरिदिनुपर्यो।”

विवादका कारण निजी क्षेत्रलाई नकारात्मक रूपमा हेर्ने वातावरण बनेको भन्दै श्रेष्ठले सम्बन्धित मन्त्रीलाई समस्या सही ढंगले समाधान गर्न आग्रह गरे।

भूतप्रभावी रूपमा बिल नपठाउन आग्रह

श्रेष्ठले विगतमा छुट भएको भन्दै पानी उद्योगलाई विद्युत्को बिल पठाउन थालिएको विषय पनि उठाए। उनले सरकारलाई भूतप्रभावी रूपमा महसुल असुल गर्ने काम नगर्न आग्रह गरे।

निजी क्षेत्र र सरकारबीच सहकार्यबाट ऊर्जा क्षेत्रलाई अघि बढाउनुपर्नेमा जोड दिँदै उनले विद्युत् क्षेत्रमा निजी लगानी विस्तारका लागि सरकारले सहजीकरण गर्नुपर्ने बताए।

विद्युत् खपत बढाउन निजी लगानी आवश्यक

आफ्नो समूहले करिब ५० मेगावाट विद्युत् खपत गरिरहेको उल्लेख गर्दै श्रेष्ठले सरकारले आवश्यक सहजीकरण गरे ऊर्जा क्षेत्रमा थप लगानी गर्न निजी क्षेत्र उत्साहित हुने बताए।

उनले भने, “उद्योगले पनि बिजुलीको लाभ लिन्छौँ । ५० मेगावाट जति बिजुली खपत गर्छौं । मलाई भोलिका दिनमा लगानी गर्न प्रेरणा मिल्छ कि ?”

श्रेष्ठले ऊर्जा क्षेत्रमा देखिएका विवाद समाधान गर्दै उद्योगमैत्री वातावरण निर्माण गर्न सरकार र निजी क्षेत्रबीच सहकार्य आवश्यक रहेको बताए।

Originally published on abcnews.com.np.