काठमाडौं । नेपाली कांग्रेसका सांसद प्रकाश सिंह कार्कीले सरकारी सेवा प्रवाहमा नागरिकले पटक–पटक परिचय तथा कागजात प्रमाणित गर्नुपर्ने झन्झट अन्त्य गर्न सरकारको ध्यानाकर्षण गराएका छन्।
सोमबार प्रतिनिधिसभाको बैठकमा बोल्दै सांसद कार्कीले राज्यसँग नागरिकको विवरण हुँदाहुँदै पनि सरकारी कार्यालयमा हरेकपटक विभिन्न कागजात मागिनु डिजिटल शासनको प्रभावकारितामाथि नै प्रश्न भएको बताए।
उनले नागरिकता, राष्ट्रिय परिचयपत्र, राहदानी र सवारी चालक अनुमतिपत्रजस्ता परिचयपत्र हुँदाहुँदै पनि सरकारी कार्यालयमा थप प्रमाण खोज्ने प्रवृत्तिले नागरिकलाई अनावश्यक सास्ती भइरहेको बताए।
‘सरकारलाई मेरो सरल प्रश्न छ, सरकारलाई आफ्नै नागरिक चिन्नको लागि यति धेरै कागज किन चाहिन्छ? आफ्नै देशमा आफ्नो पहिचान प्रमाणित गर्न नागरिकले कति पटक प्रमाण दिनुपर्ने हो?’ उनले प्रश्न गरे।
उनले राज्यसँग नागरिकको विवरण भए पनि सरकारी प्रणालीबीच आवश्यक समन्वय हुन नसकेको टिप्पणी गरे।
‘नागरिकता, राष्ट्रिय परिचयपत्र, राहदानी, लाइसेन्स छ तर पनि यीमध्ये एउटाले पुग्दैन। सरकारी कार्यालयमा पुग्यो कि फेरि अर्को प्रमाण खोजिन्छ,’ उनले भने।
‘नागरिकको झोलामा होइन, प्रणालीमा विवरण खोजिनुपर्छ’
सांसद कार्कीले नागरिकले सरकारी सेवा लिन जाँदा धेरैवटा कागजात बोकेर हिँड्नुपर्ने अवस्थाप्रति व्यंग्य गर्दै डिजिटल प्रणालीलाई प्रभावकारी बनाउनुपर्ने बताए।
‘सरकारी कार्यालयमा पुग्दा लाग्छ नागरिकसँग परिचयपत्र हैन परिचयपत्रको परिवार नै साथमा ल्याउनुपर्ने रहेछ। एउटै नागरिक चार वटा परिचयपत्र तर सरकारको विश्वास चाहिँ शून्य,’ उनले भने।
उनले प्रविधिको प्रयोग गरेर नागरिकको विवरण सरकारी प्रणालीबाटै प्रमाणित हुने व्यवस्था मिलाउनुपर्नेमा जोड दिए।
‘यो कस्तो डिजिटल सरकार हो जहाँ नागरिकको विवरण कम्प्युटरमा होइन नागरिककै झोलामा खोजिन्छ?’ उनले प्रश्न गरे।
एकीकृत डिजिटल प्रणालीको माग
कार्कीले सरकारी सेवा प्रवाहलाई सरल, छरितो र नागरिकमैत्री बनाउन विभिन्न सरकारी निकायका सूचना प्रणालीबीच एकीकरण आवश्यक रहेको बताए।
नागरिकता नम्बर वा राष्ट्रिय परिचयपत्रजस्ता आधारभूत विवरणका आधारमा आवश्यक सूचना सरकारी प्रणालीबाटै प्राप्त हुने व्यवस्था मिलाउन सके नागरिकले पटक–पटक कागजात बोकेर कार्यालय धाउनुपर्ने बाध्यता हट्ने उनको भनाइ छ।
उनले प्रविधि उपलब्ध हुँदाहुँदै पनि त्यसको प्रभावकारी प्रयोग हुन नसकेको भन्दै एकीकृत डिजिटल प्रणालीमार्फत नागरिकलाई सहज सेवा उपलब्ध गराउन सरकारसँग आग्रह गरे।
Originally published on abcnews.com.np.
प्रतिक्रिया दिनुहोस्