काठमाडौं । श्रम संस्कृति पार्टीका अध्यक्ष हर्क साम्पाङले नेपाल र भारतबीचको खुला सीमा बन्द गरी आवागमनमा भिसा प्रणाली लागू गर्नुपर्ने प्रस्ताव गरेका छन्।

प्रतिनिधिसभाको बैठकमा बोल्दै साम्पाङले खुला सीमाका कारण नागरिकको आवागमनको यकिन अभिलेख राख्न कठिन भएको भन्दै नेपाल–भारत सीमा व्यवस्थापनलाई नयाँ ढङ्गले अघि बढाउनुपर्ने बताए।

“भारत र नेपालबीचको खुला सीमा राख्न हुँदैन। भिसा सिस्टम बनाऔँ, सिल गरौँ। ताकि थाहा होस् कति नेपाली भारत गएर बसिरहेका छन्, कति लाख भारतीय नेपालमा आएर बसिरहेका छन्,” उनले भने।

‘खुला सीमाका कारण अपराध बढ्यो’

साम्पाङले खुला सीमाका कारण मानव बेचबिखनलगायत विभिन्न आपराधिक गतिविधि बढिरहेको दाबी गरे।

उनका अनुसार दुई देशबीच नागरिकको आवतजावत खुला हुँदा सीमा पार गर्ने व्यक्तिको व्यवस्थित अभिलेख राख्न नसकिने र यसले सुरक्षा चुनौती सिर्जना गर्ने गरेको छ।

“दुनियाँमा कतै नभएको भारत र नेपालको सिमाना चाहिँ खुला हुनुपर्ने?” प्रश्न गर्दै उनले सीमा बन्द गरी भिसा प्रणाली लागू गर्नुपर्ने बताए।

उनले दुई देशका नागरिकको आवतजावतको व्यवस्थित रेकर्ड राख्नुपर्नेमा समेत जोड दिए।

‘आवागमनको रेकर्ड आवश्यक’

साम्पाङले सीमा व्यवस्थापनलाई राष्ट्रिय सुरक्षासँग जोडेर हेर्नुपर्ने बताए। भिसा प्रणाली लागू भए नेपालबाट भारत जाने र भारतबाट नेपाल आउने नागरिकको विवरण व्यवस्थित रूपमा राख्न सकिने उनको तर्क छ।

उनका अनुसार यस्तो व्यवस्थाले सीमा क्षेत्रमा हुने मानव बेचबिखन, अवैध ओसारपसार तथा अन्य आपराधिक गतिविधि नियन्त्रणमा सहयोग पुग्न सक्छ।

नेपाल र भारतबीच लामो समयदेखि कायम रहेको खुला सीमा दुई देशबीचको विशेष सम्बन्धको महत्वपूर्ण पक्ष रहँदै आएको छ। साम्पाङको पछिल्लो प्रस्तावले भने खुला सीमा, सीमा सुरक्षा, नागरिक आवागमन र दुई देशबीचको सम्बन्धको भविष्यबारे नयाँ राजनीतिक बहस निम्त्याउने देखिएको छ।

Originally published on abcnews.com.np.