पोखरा । पोखरा विश्वविद्यालयले इन्जिनियरिङतर्फ पहिलोपटक विद्यावारिधि (पीएचडी) तहको अध्ययन सुरु गर्ने भएको छ। विश्वविद्यालयको विज्ञान तथा प्रविधि संकायले सिभिल इन्जिनियरिङ तथा इलेक्ट्रिकल एन्ड इलेक्ट्रोनिक्स इन्जिनियरिङमा पीएचडीका लागि आवेदन आह्वान गरेको हो।

विश्वविद्यालयले अनुसन्धानमा रुचि भएका तथा बलियो शैक्षिक पृष्ठभूमि भएका योग्य उम्मेदवारलाई आवेदन दिन आग्रह गरेको छ। इच्छुक उम्मेदवारले २०८३ भदौ ९ गतेसम्म आवेदन दिन सक्नेछन्।

पीएचडी प्रवेश परीक्षा २०८३ भदौ १२ गते सोमबार बिहान ११ बजेदेखि दिउँसो १ बजेसम्म पोखरा विश्वविद्यालयको स्कुल अफ इन्जिनियरिङ, ढुंगेपाटन, कास्कीमा सञ्चालन हुने विश्वविद्यालयले जनाएको छ।

प्रवेश परीक्षाको दिन नै व्यक्तिगत अन्तर्वार्ताको मिति घोषणा गरिने विश्वविद्यालयले जनाएको छ। पीएचडी अध्ययनका लागि आवेदन शुल्क ३ हजार रुपैयाँ तोकिएको छ।

सिभिल इन्जिनियरिङ र इलेक्ट्रिकल एन्ड इलेक्ट्रोनिक्स इन्जिनियरिङमा पीएचडी गर्न इच्छुक उम्मेदवारले पोखरा विश्वविद्यालयको विज्ञान तथा प्रविधि संकायमार्फत आवेदन दिन सक्नेछन्।

विश्वविद्यालयले इन्जिनियरिङ क्षेत्रमा अनुसन्धान तथा उच्चस्तरीय जनशक्ति उत्पादन गर्ने उद्देश्यले पीएचडी कार्यक्रम सुरु गर्न लागेको जनाएको छ।

Originally published on abcnews.com.np.