काठमाडौं । शिक्षा तथा खेलकुद मन्त्री सस्मित पोखरेलले काठमाडौंस्थित चार सामुदायिक विद्यालयको अवलोकन गरेका छन्। सामुदायिक विद्यालयको शैक्षिक अवस्था, व्यवस्थापन तथा विद्यार्थीका समस्या र आवश्यकताबारे प्रत्यक्ष जानकारी लिने उद्देश्यले शिक्षा मन्त्रालयले सुरु गरेको अभियानअन्तर्गत मन्त्री पोखरेलले विद्यालयहरूको अवलोकन गरेका हुन्।

मन्त्री पोखरेलले बाल विकास आधारभूत विद्यालय, पञ्चकन्या माध्यमिक विद्यालय, आत्म विकास आधारभूत विद्यालय र श्री बुढानीलकण्ठ उच्च माध्यमिक विद्यालय पुगेर विद्यालय प्रशासन, शिक्षक तथा विद्यार्थीसँग अन्तरक्रिया गरेका थिए।

अवलोकनका क्रममा उनले विद्यालयको समग्र अवस्था, पठनपाठनको स्थिति, विद्यार्थीका समस्या तथा विद्यालय सुधारका लागि आवश्यक पहलका विषयमा जानकारी लिएका थिए।

मन्त्री पोखरेलले विद्यालयमा देखिएका समस्या तथा प्राप्त सुझावलाई नीतिगत रूपमा सम्बोधन गर्ने प्रतिबद्धता जनाउँदै सामुदायिक विद्यालयको शैक्षिक गुणस्तर सुधार र विद्यार्थीमैत्री वातावरण निर्माणलाई मन्त्रालयले प्राथमिकतामा राखेको बताए।

उनले विद्यालयको वास्तविक अवस्था स्थलगत रूपमा बुझेर आवश्यक सुधारका लागि प्रभावकारी पहल गर्न अवलोकन अभियान सुरु गरिएको जानकारी दिए।

देशभर अभियान विस्तार गरिने

शिक्षा मन्त्रालयले सामुदायिक विद्यालयको वास्तविक अवस्था पहिचान गर्न देशव्यापी रूपमा विद्यालय अवलोकन अभियानलाई निरन्तरता दिने जनाएको छ।

विद्यालयमा देखिएका समस्या समाधान, शैक्षिक गुणस्तर सुधार तथा आवश्यक क्षेत्रमा प्रभावकारी समन्वय र पहल गर्ने उद्देश्यले अभियान सञ्चालन गरिएको मन्त्रालयले जनाएको छ।

Originally published on abcnews.com.np.