काठमाडौं । वर्षासँगै देशका ३० जिल्लामा आज (भदौ २ गते) आकस्मिक बाढीको मध्यम जोखिम रहेको बाढी पूर्वानुमान महाशाखाले जनाएको छ। महाशाखाका अनुसार केही साना तथा ठूला नदीमा पानीको बहाव उल्लेख्य रूपमा बढ्ने सम्भावना छ।

महाशाखाका अनुसार ताप्लेजुङ, संखुवासभा, सोलुखुम्बु, खोटाङ, ओखलढुंगा, रामेछाप, दोलखा, सिन्धुपाल्चोक, काठमाडौं, भक्तपुर, ललितपुर, काभ्रेपलाञ्चोक, रुकुम पूर्व, रुकुम पश्चिम, जाजरकोट, डोल्पा, जुम्ला, सुर्खेत, दैलेख, दाङ, बाँके, बर्दिया, दार्चुला, बैतडी, बझाङ, डोटी, डडेलधुरा, कैलाली र कञ्चनपुर तथा आसपासका जिल्लामा बहने स–साना नदीमा बहाव बढ्ने पूर्वानुमान गरिएको छ।

यी जिल्लामा आकस्मिक बाढीको मध्यम जोखिम रहेकाले नदी तथा खोलानालाको आसपासका बस्ती र सडक क्षेत्रमा सतर्कता अपनाउन आग्रह गरिएको छ।

यस्तै महाकाली, कर्णाली र नारायणीसहित केही ठूला नदीमा समेत पानीको बहाव उल्लेख्य रूपमा बढ्ने महाशाखाले जनाएको छ।

लगातारको वर्षाका कारण नदी तथा खोलाको जलस्तर अचानक बढ्न सक्ने भएकाले तटीय क्षेत्रका बासिन्दालाई विशेष सावधानी अपनाउन तथा जोखिमयुक्त क्षेत्रमा अनावश्यक आवतजावत नगर्न महाशाखाले आग्रह गरेको छ।

Originally published on abcnews.com.np.