काठमाडौं । देशका धेरैजसो भूभागमा सोमबार वर्षा भएको छ । केही स्थानमा मंगलबार बिहानसमेत वर्षा भएको जल तथा मौसम विज्ञान विभागले जनाएको छ । विभागका अनुसार पछिल्लो २४ घण्टामा बझाङको थलरामा सबैभन्दा धेरै ९८.८ मिलिमिटर वर्षा मापन भएको छ ।

मंगलबार बिहान ८ः५२ बजेसम्मको मापनअनुसार थलरामा भएको वर्षालाई विभागले ‘भारी’ वर्षाका रूपमा वर्गीकरण गरेको छ ।

विभागका अनुसार पछिल्लो २४ घण्टामा कोशी, लुम्बिनी, कर्णाली र सुदूरपश्चिम प्रदेशका केही स्थानमा ‘मध्यम’ वर्षा भएको छ । अन्य प्रदेशका विभिन्न स्थानमा पनि हल्कादेखि मध्यम वर्षा भएको विभागले जनाएको छ ।

हाल देशभर मनसुनी वायुको प्रभाव रहेको छ । यस्तै, मनसुनको न्यूनचापीय रेखा सरदर स्थान आसपास रहेको विभागले जनाएको छ ।

वर्षाका कारण केही स्थानमा नदी तथा खोलाको बहाव बढ्न सक्ने भएकाले जोखिमयुक्त क्षेत्रका बासिन्दालाई सतर्क रहन आग्रह गरिएको छ।

Originally published on abcnews.com.np.