काठमाडौँ । काठमाडौँ उपत्यकामा आज बुधबार पनि वर्षाको सम्भावना रहेको मौसमविद्हरूले बताएका छन्। मौसम पूर्वानुमान महाशाखाका मौसमविद् हरिप्रसाद दाहालका अनुसार उपत्यकामा आज मध्यम वर्षा हुनसक्ने सम्भावना छ।
मौसमविद् दाहालका अनुसार बिहानदेखि दिउँसोसम्म काठमाडौँको मौसममा घाम र बादलको अवस्था देखिए पनि अपराह्नतिर वर्षा हुने सम्भावना बढ्नेछ।
उनका अनुसार दिउँसो २–३ बजेदेखि वर्षा सुरु हुनसक्ने सम्भावना छ। वर्षा सुरु हुनुअघि भने उपत्यकाको आकाशमा सामान्यतया बादल लाग्नेछ र केही समय घामसमेत देखिन सक्नेछ।
“पानी पर्नुअघिसम्म काठमाडौँ उपत्यकाको मौसम घाम र बादलले भरिने देखिन्छ,” मौसमविद् दाहालले बताएका छन्।
उनका अनुसार दिउँसो केही समय मौसम खुले पनि अपराह्न वा साँझपख फेरि बदलीसँगै वर्षा सुरु हुनसक्नेछ।
यात्रा गर्दा सावधानी अपनाउन आग्रह
अपराह्न र साँझको समयमा वर्षाको सम्भावना रहेकाले सडकमा यात्रा गर्ने सर्वसाधारणलाई मौसमको अवस्था हेरेर यात्रा गर्न सुझाव दिइएको छ। वर्षाका कारण सडकमा पानी जम्ने, सवारी आवागमन प्रभावित हुने तथा उपत्यकाका केही स्थानमा ट्राफिक व्यवस्थापनमा समेत असर पर्न सक्ने भएकाले आवश्यक सावधानी अपनाउनुपर्ने देखिन्छ।
मनसुनी गतिविधि सक्रिय रहेकाले आगामी दिनमा पनि काठमाडौँ उपत्यकामा मौसम बदलीसँगै वर्षाको सम्भावना कायम रहने मौसमविद्हरूले बताएका छन्।
Originally published on abcnews.com.np.
प्रतिक्रिया दिनुहोस्