काठमाडौँ । नेपाल स्वास्थ्य अनुसन्धान परिषद् (एनएचआरसी) को सदस्यसचिवमा डा. प्रमोद जोशी नियुक्त भएका छन्। उनले शुक्रबार स्वास्थ्य तथा खाद्य स्वच्छतामन्त्री निशा मेहतासमक्ष पद तथा गोपनीयताको शपथ लिएका हुन्।

डा. जोशी स्वास्थ्य अनुसन्धान, चिकित्सा सेवा तथा प्रशासनिक क्षेत्रमा लामो अनुभव भएका चिकित्सक हुन्। उनले नेपाल स्वास्थ्य अनुसन्धान परिषद्को नेतृत्व तहमा समेत काम गरिसकेका छन्।

जोशीले सन् २००० मा युक्रेनको ओडेसा स्टेट मेडिकल युनिभर्सिटीबाट एमबीबीएस तथा सन् २००९ मा नेशनल एकेडेमी अफ मेडिकल साइन्सेस (न्याम्स) बाट अर्थोपेडिक्स तथा ट्रमा विषयमा एमएस गरेका छन्। उनले भारतको इन्द्रप्रस्थ अपोलो अस्पतालबाट आर्थोप्लास्टी तथा आर्थोस्कोपीमा फेलोसिपसमेत हासिल गरेका छन्।

परिषद्मा नेतृत्वको अनुभव

डा. जोशीले सन् २०२४ देखि २०२६ सम्म नेपाल स्वास्थ्य अनुसन्धान परिषद्को कार्यकारी सदस्यसचिवका रूपमा जिम्मेवारी सम्हालेका थिए।

त्यसअघि उनी राष्ट्रिय ट्रमा सेन्टरका मेडिकल सुपरिटेन्डेन्ट, गेटा अस्पतालका संस्थापक निर्देशक तथा सेती प्रादेशिक अस्पतालका वरिष्ठ अर्थोपेडिक सर्जनका रूपमा कार्यरत थिए।

चिकित्सा सेवा, स्वास्थ्य अनुसन्धान तथा स्वास्थ्य संस्था व्यवस्थापनमा प्राप्त उनको अनुभवले परिषद्को अनुसन्धानसम्बन्धी कामलाई प्रभावकारी बनाउन सहयोग पुग्ने अपेक्षा गरिएको छ।

Originally published on abcnews.com.np.