पोखरा । पोखरा महानगरपालिका–९ शान्तिवन रामघाटस्थित सेती नदीको भिरबाट खसेर अड्किएका एक युवकलाई प्रहरीले सकुशल उद्धार गरेको छ ।

बिहीबार बिहान करिब ६ः०५ बजे सेती नदीको भिरमा करिब २५ देखि ३० मिटर तल एक पुरुष अड्किएको सूचना पाएपछि जिल्ला प्रहरी कार्यालय कास्की र सीआरभी पृथ्वीचोकबाट प्रहरी टोली घटनास्थल पुगेको थियो ।

प्रहरीले तत्काल उद्धार अभियान सञ्चालन गरी भिरमा अड्किएका युवकलाई सकुशल बाहिर निकालेको हो । उद्धार गरिएका युवक रुपन्देहीको बुटवल उपमहानगरपालिका–९ घर भई हाल पोखरा–९ पृथ्वीचोक बस्दै आएका २८ वर्षीय अनिल परियार रहेको प्रहरीले जनाएको छ ।

उद्धारपछि परियारलाई उपचारका लागि पश्चिमाञ्चल क्षेत्रीय अस्पताल पोखरा लगिएको थियो । उपचारपछि उनी बोल्न सक्ने अवस्थामा रहेको र स्वास्थ्य अवस्था मध्यम रहेको प्रहरीले जनाएको छ ।

स्थानीयवासीले सेती नदीको भिरमा एक व्यक्ति अड्किएको देखेपछि प्रहरीलाई खबर गरेका थिए । सूचना प्राप्त हुनासाथ प्रहरी टोली परिचालन गरी जोखिमपूर्ण स्थानबाट युवकको उद्धार गरिएको हो ।

घटनाबारे थप अनुसन्धान भइरहेको जिल्ला प्रहरी कार्यालय कास्कीले जनाएको छ।

Originally published on abcnews.com.np.