काठमाडौं । राष्ट्रिय स्वतन्त्र पार्टी (रास्वपा) ले केन्द्रीय सदस्यहरूका लागि आयोजना गरेको ‘नीति, संगठन र नेतृत्व’सम्बन्धी दुईदिने कार्यशाला सुरु भएको छ।

‘रास्वपा कार्यशाला–नीति, संगठन र नेतृत्व, शृङ्खला–१’ नाम दिइएको कार्यशालामा पार्टीको नीति, संगठन सुदृढीकरण र नेतृत्व क्षमता विकासका विषयमा छलफल भइरहेको संगठन विभाग प्रमुख प्रमोद न्यौपानेले जानकारी दिए।

कार्यशालाको पहिलो दिन ‘नेपालको चित्र, हामी कहाँ छौँ ?’ शीर्षकमा अनिल चित्रकारले देशको वर्तमान अवस्था र चुनौतीबारे प्रस्तुति दिने कार्यक्रम छ। यस्तै, उपसभापति डा. स्वर्णिम वाग्लेले पार्टीको प्रस्तावना, सामाजिक लोकतन्त्र र त्यसका आधारबारे प्रस्तुति दिनेछन्।

महामन्त्री विपिनकुमार आचार्यले पार्टीका आधारभूत मूल्य–मान्यता तथा स्थानीय निर्वाचनका लागि उम्मेदवार छनोटको रूपरेखाबारे प्रस्तुति दिनेछन्। पूर्वसचिव सुरेन्द्र अर्यालले बजेट निर्माणको वैज्ञानिक प्रक्रियाबारे जानकारी दिने कार्यक्रम छ।

उपसभापति सोविता गौतमले पार्टी र सरकारबीचको अन्तरसम्बन्ध, देखिएका समस्या तथा समाधानका उपायबारे प्रस्तुति दिनेछिन्।

कार्यशालाको दोस्रो दिन कविन्द्र बुर्लाकोटीले पार्टीको संगठनात्मक संरचना, त्यसको सुदृढीकरण तथा केन्द्रीय सदस्यहरूको भूमिकाबारे प्रस्तुति दिने कार्यक्रम छ।

यस्तै, संगठन विभाग प्रमुख न्यौपानेले ‘मिडिया र सोसल मिडिया : कसरी प्रयोग गर्ने ?’ विषयमा प्रशिक्षण दिनेछन्। कार्यशालामार्फत पार्टीको नीति, संगठन र नेतृत्वलाई थप प्रभावकारी बनाउने विषयमा छलफल तथा प्रशिक्षण गरिने रास्वपाले जनाएको छ।

Originally published on abcnews.com.np.