काठमाडौं । मानव बेचबिखन तथा ओसारपसारमा संलग्न रहेको आरोपमा प्रहरीले एक महिलालाई पक्राउ गरेको छ। पक्राउ पर्नेमा काठमाडौंको तारकेश्वर नगरपालिका–७ मा बस्दै आएकी नवलपरासी (बर्दघाट सुस्ता पूर्व)को देवचुली नगरपालिका–११ की ३१ वर्षीया ममता पछाई रहेकी छन्।

प्रहरी प्रधान कार्यालयका अनुसार पछाईलाई शुक्रबार (भदौ ५) तारकेश्वर–७, थापागाउँबाट पक्राउ गरिएको हो।

प्रहरीका अनुसार एक महिलालाई घरेलु कामदारका रूपमा कुवेत पठाएर करिब डेढ महिनादेखि बन्धक बनाएर राखिएको सूचना प्राप्त भएपछि परराष्ट्र मन्त्रालय तथा सम्बन्धित नेपाली राजदूतावाससँग समन्वय गरी उद्धार गरिएको थियो।

त्यसपछि ती महिलालाई कुवेत पठाउने कार्यमा संलग्न व्यक्तिहरूको खोजी गर्ने क्रममा काठमाडौं उपत्यका अपराध अनुसन्धान कार्यालयबाट खटिएको टोलीले पछाईलाई पक्राउ गरेको हो।

सामाजिक सञ्जालमार्फत प्रलोभन

प्रहरीका अनुसार पछाईले फेसबुक, ह्वाट्सएपलगायत सामाजिक सञ्जालमार्फत विभिन्न व्यक्तिसँग अनलाइन सम्पर्क गरी आकर्षक तलब तथा सुविधाको प्रलोभन देखाउँदै घरेलु कामदारका रूपमा कुवेत पठाइदिने बताउने गरेकी थिइन्।

यसरी उनले विभिन्न स्थानबाट महिलालाई काठमाडौं बोलाउने गरेको अनुसन्धानबाट खुलेको प्रहरीले जनाएको छ।

पछिल्लो पटक पछाईको सम्पर्कमा आएका नौ जना महिलालाई समेत कुवेत पठाउने तयारी भइरहेको अवस्थामा प्रहरीले उनीहरूको उद्धार गरेको जनाएको छ।

प्रहरीले पक्राउ परेकी पछाईविरुद्ध मानव बेचबिखन तथा ओसारपसारसम्बन्धी कसुरमा थप अनुसन्धान तथा आवश्यक कानुनी कारबाही अघि बढाएको छ।