हेटौँडा । पूर्वी मकवानपुरको बकैया गाउँपालिका–४ स्थित लोहाजोर खोलामा पौडी खेल्ने क्रममा डुबेर १२ वर्षीय बालकको मृत्यु भएको छ।

मृत्यु हुनेमा बकैया गाउँपालिका–३, हात्तीसुँडेका कृशल दाहाल रहेका छन्।

बागमती प्रदेश प्रहरी कार्यालय, हेटौँडाका अनुसार कृशल शनिबार दिउँसो आफ्ना दुई जना साथीसँग लोहाजोर खोलामा पौडी खेल्न गएका थिए। दिउँसो १२:५० बजेतिर पौडी खेल्ने क्रममा उनी खोलामा डुबेका थिए।

घटनाको जानकारी प्राप्त हुनासाथ प्रहरी चौकी हात्तीसुँडेबाट प्रहरी नायब निरीक्षक कामबहादुर गुरुङको कमान्डमा चार सदस्यीय प्रहरी टोली घटनास्थलमा पुगेको थियो।

प्रहरी र स्थानीयवासीको सहयोगमा खोलाबाट उद्धार गरिएका कृशललाई उपचारका लागि मकवानपुर सहकारी अस्पताल लगिएको थियो। उपचारकै क्रममा दिउँसो २:१० बजे चिकित्सकले उनलाई मृत घोषणा गरेका थिए।

बागमती प्रदेश प्रहरी कार्यालयका सूचना अधिकारी प्रहरी वरिष्ठ उपरीक्षक राजेन्द्रप्रसाद धमलाका अनुसार पौडी खेल्न गएका अन्य दुई बालक भने सकुशल रहेका छन्।

प्रहरीले घटनाबारे आवश्यक अनुसन्धान अघि बढाएको जनाएको छ।

Originally published on abcnews.com.np.