काठमाडौँ । गैरआवासीय नेपाली संघ (एनआरएनए) र नेपाल रेडक्रस सोसाइटीबीच मानवीय सेवा तथा परोपकारी कार्यमा सहकार्य गर्ने उद्देश्यले समझदारीपत्रमा हस्ताक्षर भएको छ।

सोमबार आयोजित एक कार्यक्रममा दुई संस्थाले विपद् व्यवस्थापन, राहत तथा मानवीय सेवाका क्षेत्रमा थप संगठित र प्रभावकारी रूपमा सहकार्य गर्ने प्रतिबद्धता व्यक्त गरेका हुन्।

कार्यक्रमलाई सम्बोधन गर्दै एनआरएनएका अध्यक्ष डा. हेमराज शर्माले रेडक्रस र एनआरएनएको कार्य प्रकृतिमा धेरै समानता रहेको बताए। एनआरएनएको तीन प्रमुख स्तम्भमध्ये मानवीय सहायता तथा परोपकार पनि एक रहेको उल्लेख गर्दै उनले नयाँ समझदारीले सेवा क्षेत्रमा सहकार्यको नयाँ आयाम थप्ने विश्वास व्यक्त गरे।

अध्यक्ष शर्माका अनुसार एनआरएनएको राष्ट्रिय समन्वय परिषद् (एनसीसी) हाल विश्वका ९२ देशमा विस्तार भइसकेको छ। यस कार्यकालभित्र यसलाई १०० देशमा पुर्‍याउने लक्ष्य रहेको उनले बताए।

उनले कोभिड–१९ महामारीका समयमा कतारलगायत विभिन्न देशमा रेडक्रससँग मिलेर काम गरिसकेको स्मरण गरे। साथै, एनआरएनएले नेपालका पाँच प्रदेशमा ‘ब्लड बस’ हस्तान्तरण गरिसकेको र बाँकी दुई प्रदेश तथा केन्द्रका लागि थप तीनवटा बस उपलब्ध गराउने योजना रहेको जानकारी दिए।

विदेशमा रहेका नेपालीका लागि पनि सहकार्य

समझदारीपत्रसँगै नेपालभित्र मात्र नभई विदेशमा रहेका नेपाली समुदायका लागि पनि रेडक्रससँग सहकार्य विस्तार गर्ने एनआरएनएको योजना रहेको शर्माले बताए।

विशेषगरी वैदेशिक रोजगारीमा रहेका नेपाली श्रमिकको ठूलो संख्या रहेका मध्यपूर्व तथा मलेसियाजस्ता मुलुकमा राहत र मानवीय सहायता कार्यक्रम सञ्चालन गर्न समन्वय गरिने उनले बताए।

त्यस्तै, दोस्रो पुस्ताका गैरआवासीय नेपालीलाई नेपालको माटो र सामाजिक सेवासँग जोड्ने उद्देश्यले ‘स्वयंसेवक कार्यक्रम’मार्फत नेपाल रेडक्रसका विभिन्न गतिविधिमा सहभागी गराउने योजना पनि एनआरएनएले अघि सारेको छ।

विपद् राहतमा पनि जोड

आगामी मनसुनमा हुन सक्ने प्राकृतिक विपद्लाई मध्यनजर गर्दै एनआरएनएले तत्काल राहत कोष संकलनमा सहयोग गर्ने प्रतिबद्धता जनाएको छ।

समझदारीपत्रले विपद् प्रतिकार्य, राहत वितरण, रक्तदान, मानवीय सहायता तथा विदेशमा रहेका नेपाली समुदायसँग सम्बन्धित परोपकारी कार्यक्रमलाई थप व्यवस्थित र प्रभावकारी बनाउने अपेक्षा गरिएको छ।

सम्झौता कार्यक्रममा नेपाल रेडक्रस सोसाइटी तथा अन्तर्राष्ट्रिय रेडक्रस महासंघका प्रतिनिधिहरूको समेत उपस्थिति रहेको थियो।

Originally published on abcnews.com.np.