काठमाडौँ । तिब्बततर्फबाट आएको बाढीका कारण रसुवाको टिमुरेस्थित बोर्डर आउट पोस्ट (बीओपी) मा खटिएका नौ जना सशस्त्र प्रहरीसँग सम्पर्क विच्छेद भएको छ ।
सशस्त्र प्रहरी बलका अनुसार उनीहरूसँग हालसम्म कुनै प्रकारको सम्पर्क स्थापित हुन सकेको छैन । घटना लगत्तै उनीहरूको खोजी तथा उद्धारका लागि टोली परिचालन गरिएको छ ।
टिमुरे बीओपीमा तैनाथ अन्य २५ देखि ३० जना सशस्त्र प्रहरी भने सुरक्षित रहेको बताइएको छ ।
चीनको तिब्बत क्षेत्रबाट आएको अचानकको बाढीले रसुवामा ठूलो क्षति पुर्याएको छ । बाढीका कारण जनधनको क्षति भएको प्रारम्भिक विवरण प्राप्त भएको छ ।
घरटहरा, पुल र सडकमा क्षति
अचानक आएको बाढीले टिमुरे क्षेत्रमा व्यापक क्षति पुर्याएको स्थानीयवासीले बताएका छन् । बाढीले घरटहरा, पुल तथा सडक बगाएपछि काठमाडौँ–रसुवा आवतजावतसमेत प्रभावित भएको छ ।
टिमुरे बीओपीको अवस्थाबारे विस्तृत विवरण भने आउन बाँकी रहेको सशस्त्र प्रहरीले जनाएको छ ।
बाढी प्रभावित क्षेत्रमा राहत तथा उद्धारका लागि आवश्यक सामग्री पठाउने तयारी भइरहेको सशस्त्र प्रहरी बलले जनाएको छ ।
Originally published on abcnews.com.np.
प्रतिक्रिया दिनुहोस्