काठमाडौँ । तिब्बततर्फबाट रसुवा हुँदै आएको ठूलो बाढीले त्रिशूली नदी तटीय क्षेत्रमा रहेका ३०० मेगावाटभन्दा बढी क्षमताका जलविद्युत् आयोजनामा ठूलो क्षति पुगेको प्रारम्भिक अनुमान ऊर्जा मन्त्रालयले गरेको छ ।

मन्त्रालयका अनुसार बाढीबाट निर्माणाधीन तथा सञ्चालनमा रहेका दुवै प्रकृतिका जलविद्युत् आयोजना प्रभावित भएका छन् । प्रारम्भिक आकलनमा केही आयोजनाका विद्युत्गृह तथा सबस्टेसनमा समेत ठूलो क्षति पुगेको जनाइएको छ ।

बाढीबाट रसुवागढी १११ मेगावाट, चिलिमे २२ मेगावाट, त्रिशूली–३ ए ६० मेगावाट, त्रिशूली–३ बी ३७ मेगावाट, मैलुङ १४ मेगावाट र त्रिशूली–बेनिघाट ३५ मेगावाटका आयोजनामा क्षति पुगेको मन्त्रालयले जनाएको छ ।

त्यस्तै, ५७ मेगावाट क्षमताको साञ्जेन (अप्पर) तथा साञ्जेन जलविद्युत् आयोजनामा समेत बाढीले क्षति पुर्‍याएको प्रारम्भिक विवरण छ ।

ऊर्जा मन्त्रालयका अनुसार क्षतिको यकिन विवरण भने अझै प्राप्त भएको छैन । बाढी प्रभावित आयोजनामा कार्यरत कर्मचारीको अवस्थाबारे समेत विवरण संकलन भइरहेको छ ।

ऊर्जामन्त्री विराजभक्त श्रेष्ठको सचिवालयका एक अधिकारीका अनुसार बाढी अझै आइरहेकाले प्रभावित क्षेत्रमा पुगेर क्षतिको विवरण संकलन गर्न कठिनाइ भइरहेको छ ।

स्वतन्त्र ऊर्जा उत्पादकहरूको संस्था, नेपाल (इप्पान) का प्रमुख कार्यकारी अधिकृत भीमप्रसाद गौतमले पनि जलविद्युत् आयोजनामा भएको क्षतिबारे विवरण संकलन तथा बुझ्ने काम भइरहेको जानकारी दिनुभयो ।

बाढीका कारण आयोजनाका संरचना तथा उपकरणमा भएको क्षतिको विस्तृत विवरण संकलन भएपछि मात्र वास्तविक क्षतिको अवस्था स्पष्ट हुने मन्त्रालयले जनाएको छ ।

Originally published on abcnews.com.np.