काठमाडौं । बाढी प्रभावित क्षेत्रमा खोज तथा उद्धार कार्यलाई तीव्रता दिन १२ वटा हेलिकोप्टर परिचालन गरिएको छ । नेपाली सेनाका ४ वटा र निजी क्षेत्रका विभिन्न कम्पनीका ८ वटा हेलिकोप्टर उद्धार कार्यमा खटिएका छन् ।

नेपाली सेनाका अनुसार हालसम्म हेलिकोप्टरमार्फत १२ जनाको उद्धार गरिएको छ । रसुवाको स्याप्रुबेसीबाट ६ जना, मैलुङबाट २ जना र धुन्चेबाट ४ जनालाई सुरक्षित स्थानमा ल्याइएको हो ।

उद्धार गरिएका १२ जनालाई नेपाली सेनाको त्रिशूली नम्बर १ सैन्य तालिम केन्द्रमा लगिएको छ । त्यहाँ उनीहरूलाई आवश्यक प्राथमिक उपचार तथा अन्य स्वास्थ्य सेवा उपलब्ध गराइने सेनाले जनाएको छ ।

बेपत्ताको खोजी जारी

बाढी प्रभावित क्षेत्रमा नेपाली सेनाले उद्धार टोलीसहित हेलिकोप्टर परिचालन गरी खोज तथा उद्धार कार्यलाई तीव्रता दिएको छ ।

निजी क्षेत्रका हेलिकोप्टरसँग समेत समन्वय गरी उद्धार कार्य भइरहेको सेनाले जनाएको छ । उद्धार गरिएका व्यक्तिहरूको अवस्था सामान्य रहेको बताइएको छ ।

यसैबीच, बाढीका कारण बेपत्ता भएका व्यक्तिहरूको खोजी कार्यसमेत जारी छ । प्रभावित क्षेत्रमा थप उद्धार तथा राहत आवश्यक रहेकाले सुरक्षा निकायले आफ्नो परिचालनलाई निरन्तरता दिएका छन् ।

Originally published on abcnews.com.np.