रसुवा; रसुवाको भोटेकोसीमा आएको बाढीमा बुधबारसम्म सात जनाको मृत्यु भएको छ। नेपाल प्रहरीका अनुसार, नुवाकोटको नदी किनारमा तीन जना र धादिङमा चार जनाको शव फेला परेको हो।

बागमती प्रदेश प्रहरी प्रमुख दीपक रेग्मीले जानकारी दिँदै भोटेकोसी खोलामा आएको बाढीले क्षति पुर्‍याएको बताए। ‘अहिले हामी घाइतेको उद्धार र फेला परेका शव संकलन गरिरहेका छौँ,’ उनले नेपालखबरसँग भने, ‘हराएका मान्छेहरूको खोजतलास पनि भइरहेको छ।’

बाढी आएपछि भागेर पहाडतिर गएकाहरूलाई सुरक्षित स्थानमा ओसार्ने काम प्रहरीले जारी राखेको छ। घाइते भएका व्यक्तिहरूलाई धुन्चे अस्पतालमा ल्याउन थालिएको छ। प्रदेश प्रहरी प्रमुख रेग्मीले त्रिशुली अस्पताललाई बेस बनाएर हेलिकप्टरमार्फत उद्धार कार्य भइरहेको जानकारी दिए। त्यहाँबाट एम्बुलेन्समा काठमाडौँ लैजाने तयारी गरिएको पनि उनले बताए।

Originally published on abcnews.com.np.