काठमाडौं । नेपाली कांग्रेसका सांसद मोहन आचार्यले रसुवाको टिमुरे, स्याफ्रुबेसी, मैलुङबेसी, त्रिशूली बजारलगायत क्षेत्रमा बाढीले ठूलो क्षति पुर्‍याएको बताएका छन् ।

बाढीका कारण प्रभावित क्षेत्रमा जाने बाटोसमेत अवरुद्ध भएकाले घटनास्थलको वास्तविक अवस्था बुझ्न कठिन भइरहेको उनले बताए । धेरै परिवारका सदस्य तथा आफन्त सम्पर्कविहीन हुँदा स्थानीयवासी आत्तिएको उल्लेख गर्दै सांसद आचार्यले तत्काल मानवीय क्षतिको यकिन आँकडा निकाल्न सकिने अवस्था नरहेको बताए ।

उनका अनुसार रसुवासँगै नुवाकोटका विभिन्न क्षेत्रमा समेत बाढीले ठूलो क्षति पुर्‍याएको छ । प्रभावित क्षेत्रमा तत्काल उद्धार तथा राहतलाई प्राथमिकता दिनुपर्ने उनको भनाइ छ ।

नारायणी तटीय क्षेत्रमा उच्च सतर्कता

यसैबीच, रसुवामा आएको बाढीको प्रभाव नारायणी नदीमा समेत पर्न सक्ने भन्दै नवलपरासी पश्चिमको सुस्तासहित नारायणी नदी तटीय क्षेत्रमा उच्च सतर्कता अपनाउन आग्रह गरिएको छ ।

बाढीका कारण नारायणी नदीको बहाव बढ्न सक्ने सम्भावनालाई मध्यनजर गर्दै सम्बन्धित निकायलाई आवश्यक तयारी अवस्थामा रहन आग्रह गरिएको हो ।

सम्बन्धित सुरक्षा निकाय तथा प्रमुख जिल्ला अधिकारीसँग नियमित सम्पर्कमा रही नदीको बहाव र बाढीको अवस्थाबारे जानकारी लिइरहेको जनाइएको छ ।

जोखिमयुक्त बस्तीका नागरिकलाई सुरक्षित रहन आग्रह

नदी तथा खोलाको बहाव बढ्न सक्ने क्षेत्रका नागरिकलाई आवश्यक परे सुरक्षित स्थानमा स्थानान्तरण गर्न तयारी अवस्थामा रहन स्थानीय प्रशासन तथा सुरक्षा निकायलाई निर्देशन दिइएको छ ।

जोखिमयुक्त क्षेत्रमा सुरक्षित स्थान पहिचान गरी आवश्यक परे तत्काल उद्धार तथा स्थानान्तरणको व्यवस्था मिलाउन सम्बन्धित निकायलाई आग्रह गरिएको छ ।

मौसम तथा नदीको बहावका आधारमा रोल्पाका केही क्षेत्रमा समेत प्रभाव पर्न सक्ने सम्भावना रहेकाले त्यहाँका तटीय तथा जोखिमयुक्त क्षेत्रमा पनि उच्च सतर्कता अपनाउन अनुरोध गरिएको छ ।

नदीको बहाव बढेका बेला अनावश्यक रूपमा नदी तथा खोलाको किनारमा नजान, सुरक्षित स्थानमा रहन तथा स्थानीय प्रशासन र सुरक्षा निकायले जारी गर्ने सूचनाको पालना गर्न सर्वसाधारणलाई आग्रह गरिएको छ ।

प्रदेश सरकारले सम्भावित विपद्को जोखिम न्यूनीकरण, उद्धार तथा राहतका लागि आवश्यक समन्वय र तयारी गरिरहेको जनाएको छ ।

Originally published on abcnews.com.np.