काठमाडौं । रसुवाको भोटेकोसीमा आएको भीषण बाढीमा परी बगाएका तथा बेपत्ता भएकामध्ये हालसम्म १४ जनाको शव फेला परेको छ ।

बागमती प्रदेश प्रहरी कार्यालयका अनुसार रसुवा, नुवाकोट र धादिङका नदी तटीय क्षेत्रमा खोज तथा उद्धारका क्रममा ती शव फेला परेका हुन् ।

बागमती प्रदेश प्रहरी कार्यालय, हेटौंडाका प्रमुख डीआईजी दीपक रेग्मीले बाढी प्रभावित विभिन्न क्षेत्रमा खोजी तथा उद्धार कार्य जारी रहेको जानकारी दिए । नदीमा पानीको बहाव अझै तीव्र रहेकाले तटीय क्षेत्रमा समेत खोजीलाई प्राथमिकता दिइएको उनले बताए ।

१९ घाइतेको उद्धार

बाढीमा परी घाइते भएका १९ जनाको उद्धार गरिएको प्रहरीले जनाएको छ । उद्धार गरिएका घाइतेलाई उपचारका लागि विभिन्न अस्पतालमा पठाइएको डीआईजी रेग्मीले जानकारी दिए ।

बाढीका कारण रसुवा, नुवाकोट र धादिङका नदी तटीय क्षेत्रमा ठूलो जनधनको क्षति भएको प्रहरीले जनाएको छ । प्रभावित क्षेत्रमा घर तथा अन्य भौतिक संरचनामा समेत व्यापक क्षति पुगेको छ ।

बेपत्ताको खोजी जारी

बाढीमा परी बेपत्ता भएकाहरूको खोजी तथा उद्धारका लागि नेपाल प्रहरीसहित सुरक्षा निकायका टोली परिचालन गरिएको छ ।

नदीमा पानीको बहाव उच्च रहेकाले खोज तथा उद्धार कार्य चुनौतीपूर्ण बनेको प्रहरीले जनाएको छ । सुरक्षाकर्मीले नदी तटीय क्षेत्रमा निरन्तर खोजी गरिरहेका छन् ।

प्रहरीले बाढीबाट भएको थप क्षतिको विवरण संकलन गरिरहेको जनाएको छ । प्रभावित नागरिकलाई राहत तथा आवश्यक सहयोग उपलब्ध गराउने तयारीसमेत भइरहेको छ ।

Originally published on abcnews.com.np.