काठमाडौं । राष्ट्रिय स्वतन्त्र पार्टी (रास्वपा)का प्रमुख सचेतक कविन्द्र बुर्लाकोटीले रसुवाको भोटेकोशीमा आएको विनाशकारी बाढीले गोरखाबाट गोसाइँकुण्ड तीर्थयात्रामा गएका ३० जना सवार गाडी बगाएको सूचना प्राप्त भएको बताएका छन्।

प्रतिनिधिसभाको बुधबारको बैठकको आकस्मिक समयमा बोल्दै गोरखा निर्वाचन क्षेत्रबाट निर्वाचित सांसद बुर्लाकोटीले उक्त घटनाले आफूहरू सबैलाई स्तब्ध बनाएको बताए। उनले बाढी प्रभावित क्षेत्रमा अन्य तीर्थयात्रीसमेत रहेको जानकारी आएको उल्लेख गर्दै मानवीय क्षतिको वास्तविक विवरण अझै यकिन हुन नसकेको बताए।

‘गोरखाबाट गोसाइँकुण्ड गएका ३० जना सवार बस बाढीले बगाएको सूचना आएको छ। हामी सबैको मुटु हल्लिने घटना भएको छ। कहाँसम्म कति क्षति हुने हो यकिन भइसकेको छैन,’ उनले भने।

सांसद बुर्लाकोटीले अहिलेको विपद्को घडीमा खोज तथा उद्धारलाई पहिलो प्राथमिकतामा राख्न सरकारको ध्यानाकर्षण गराए। बाढीमा परेका तथा सम्पर्कविहीन नागरिक र उनीहरूका परिवारलाई राज्य एक्लै नछाड्ने विश्वास दिलाउनुपर्ने उनको भनाइ थियो।

उनले भने, विपद्मा परेका नागरिकलाई सिंगो संसद् र सरकार उनीहरूको साथमा रहेको अनुभूति दिलाउन आवश्यक छ।

रसुवाको भोटेकोशी क्षेत्रमा आएको भीषण बाढीपछि टिमुरे, स्याफ्रुबेँसीलगायतका क्षेत्रमा व्यापक जनधनको क्षति भएको विवरण आइरहेका छन्। सडक तथा सञ्चार सम्पर्क प्रभावित हुँदा धेरै स्थानको वास्तविक अवस्था र मानवीय क्षतिको पूर्ण विवरण अझै आउन बाँकी छ।

Originally published on abcnews.com.np.