काठमाडौं । रसुवामा आएको भीषण बाढीका कारण जलविद्युत् आयोजनामा कार्यरत १९६ भन्दा बढी कर्मचारी तथा कामदार सम्पर्कविहीन भएका छन्। नेपाल विद्युत् प्राधिकरणको पछिल्लो विवरणअनुसार सम्पर्कविहीन हुनेमा विदेशी कामदारसमेत रहेका छन्।

प्राधिकरणका अनुसार निर्माणाधीन त्रिशूली–३ बी आयोजनाको साइटमा कार्यरत २१ जना कर्मचारी सम्पर्कबाहिर छन्। चिलिमे जलविद्युत् केन्द्रको पावर प्लान्ट क्षेत्रमा ६ जना र आवास क्षेत्र आसपास १ जना सम्पर्कविहीन छन्।

त्यस्तै, चिलिमे जलविद्युत् कम्पनीअन्तर्गत चेस्को कम्पनीमा कार्यरत ११ जना त्रिशूली–३ बी आयोजनाको साइटमा काम गरिरहेका थिए। उनीहरूसँग पनि सम्पर्क स्थापित हुन सकेको छैन।

चिलिमे जलविद्युत् कम्पनीअन्तर्गतको रसुवागढी जलविद्युत् केन्द्रमा ५१ जना कर्मचारी सम्पर्कमा नरहेको प्राधिकरणले जनाएको छ। त्यहाँ कार्यरत अन्य कर्मचारीको अवस्थाबारे भने अझै यकिन विवरण प्राप्त हुन सकेको छैन।

यसैगरी, त्रिशूली–३ ए जलविद्युत् केन्द्रको पावर हाउसमा मर्मत कार्यमा संलग्न ४५ जना कर्मचारी तथा कामदार पनि सम्पर्कविहीन छन्। प्राधिकरणका त्रिशूली र देवीघाट जलविद्युत् केन्द्रमा कार्यरत एक/एक जना कर्मचारीसमेत सम्पर्कबाहिर छन्।

रसुवा वितरण केन्द्रअन्तर्गत चिलिमे पावर हाउसको स्विचयार्डमा कार्यरत एक जना कर्मचारी र गोटागन्तीका एक जना मिटर रिडर पनि सम्पर्कविहीन छन्।

त्यस्तै, त्रिशूली–२२० केभी ३ बी हबमा ठेकेदार कम्पनीका तर्फबाट कार्यरत १६ जना तथा रसुवागढी जलविद्युत् केन्द्रमा विभिन्न ठेकेदार कम्पनीमार्फत मर्मत, सम्भार तथा निर्माण कार्यमा खटिएका ९२ जना समेत सम्पर्कविहीन रहेको प्राधिकरणले जनाएको छ।

खोज तथा उद्धार तीव्र

बाढीपछि कर्मचारी तथा कामदार सम्पर्कविहीन भएपछि नेपाल विद्युत् प्राधिकरणका निमित्त कार्यकारी निर्देशक दीर्घायु श्रेष्ठको नेतृत्वमा टोली प्रभावित क्षेत्रमा पुगेर अनुगमन गरेको छ।

श्रेष्ठले सम्पर्कविहीन कर्मचारी तथा कामदारको खोजी र उद्धारका लागि प्राधिकरणको टोली परिचालन गरिएको जानकारी दिए। जोखिममा रहेका कर्मचारी तथा सर्वसाधारणलाई सुरक्षित स्थानमा स्थानान्तरण गर्न अर्को टोलीसमेत स्थानीय क्षेत्रमा खटाइएको उनले बताए।

उनका अनुसार सम्पर्कविहीन रहेका प्रसारण तथा उत्पादन संरचना क्षेत्रमा पुनः सम्पर्क स्थापित गर्ने प्रयास भइरहेको छ। स्थानीय प्रशासन, सुरक्षा निकाय, स्थानीय तह, स्वास्थ्य संस्था तथा सम्बन्धित सरोकारवाला निकायसँग समन्वय गरी सम्पर्कविहीन कर्मचारी तथा कार्यक्षेत्रमा रहेका व्यक्तिहरूको विवरण संकलन गर्ने काम भइरहेको छ।

प्राधिकरणले प्रभावित क्षेत्रमा खोज तथा उद्धार कार्यलाई निरन्तरता दिइरहेको जनाएको छ।

Originally published on abcnews.com.np.