काठमाडौं । उपप्रधानमन्त्री एवं गृहमन्त्री रवि लामिछानेले आज सर्वदलीय बैठक बोलाएका छन्। प्रधानमन्त्री निवास बालुवाटारमा बिहान ११ बजे बस्ने बैठकमा मुलुकको पछिल्लो राजनीतिक अवस्था र सरकारका नीतिगत प्राथमिकताबारे छलफल हुने भएको छ।

बैठकमा प्रमुख राजनीतिक दलका शीर्ष नेताहरूलाई आमन्त्रण गरिएको छ। वर्तमान राजनीतिक अवस्था, राष्ट्रिय समस्या, त्यसको समाधानका उपाय तथा सरकारको आगामी कार्ययोजनाबारे दलहरूसँग सुझाव लिने तयारी रहेको बताइएको छ।

गृहमन्त्री लामिछानेले सबै राजनीतिक दललाई बैठकमा रचनात्मक सुझावसहित सहभागी हुन आग्रह गरेका छन्।

गृहमन्त्रीको सचिवालयका अनुसार बैठकमा नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, जनता समाजवादी पार्टी नेपाल, नेकपा (एकीकृत समाजवादी) लगायतका दलका प्रतिनिधि सहभागी हुनेछन्।

यसअघि पनि गृहमन्त्री लामिछानेले विभिन्न राजनीतिक दलका नेताहरूसँग छुट्टाछुट्टै भेटवार्ता गरी समसामयिक राजनीतिक तथा राष्ट्रिय विषयमा छलफल गरेका थिए।

शान्ति सुरक्षादेखि सुशासनसम्म छलफल

सर्वदलीय बैठकमा मुलुकको वर्तमान अवस्था, शान्ति सुरक्षा, नागरिकका दैनिक जीवनसँग जोडिएका समस्या तथा तिनको समाधानका उपायबारे छलफल हुने बताइएको छ।

सरकारले अघि सारेका नीति तथा कार्यक्रमबारे समेत राजनीतिक दलसँग सुझाव आदानप्रदान गर्ने तयारी छ। भ्रष्टाचार नियन्त्रण, सुशासन, कानुनको शासन तथा राष्ट्रिय सहमति निर्माणका विषयले पनि बैठकमा प्राथमिकता पाउने बताइएको छ।

गृहमन्त्री लामिछानेले राजनीतिक स्थिरता र सामाजिक मेलमिलाप कायम गर्दै राष्ट्रिय एकताका साथ मुलुकलाई विकासको बाटोमा अघि बढाउनुपर्नेमा जोड दिएका छन्।

बैठकबाट राष्ट्रिय समस्याको समाधानका लागि राजनीतिक दलहरूबीच साझा धारणा निर्माण हुने अपेक्षा गरिएको छ।

Originally published on abcnews.com.np.