काठमाडौँ । रसुवा र नुवाकोटमा फेरि ठूलो बाढी आउन लागेको भन्दै सामाजिक सञ्जाल तथा विभिन्न माध्यमबाट फैलाइएका सूचनाप्रति बाढी पूर्वानुमान महाशाखाले ध्यानाकर्षण गराएको छ। महाशाखाले ती सूचना अपुष्ट र निराधार रहेको स्पष्ट पारेको छ।

महाशाखाका अनुसार हालसम्म प्राप्त सूचना तथा प्रारम्भिक विश्लेषणबाट रसुवा र नुवाकोट क्षेत्रमा तत्कालै अर्को विनाशकारी बाढी आउने सम्भावना देखिएको छैन। नागरिकलाई सामाजिक सञ्जालमा फैलिरहेका हल्ला र अपुष्ट सूचनाको पछि नलाग्न पनि आग्रह गरिएको छ।

पछिल्ला केही दिनदेखि उक्त क्षेत्रमा वर्षा भइरहेकाले नदी तथा खोलाहरूको बहावमा केही वृद्धि हुन सक्ने भए पनि तत्काल ठूलो र विनाशकारी बाढी आउने संकेत प्राप्त नभएको महाशाखाले जनाएको छ।

नेपालतर्फ असामान्य रूपमा ठूलो बाढी आउने सम्भावना देखिएमा सीमाक्षेत्रमा तैनाथ सुरक्षा निकाय तथा सम्बन्धित निकायसँग समन्वय गरी नागरिकलाई तत्काल जानकारी गराइने महाशाखाले जनाएको छ।

महाशाखाले सम्भावित जोखिमबारे एसएमएस तथा उपलब्ध अन्य सञ्चार माध्यमबाट आधिकारिक पूर्वसूचना जारी गरिने स्पष्ट पारेको छ। नागरिकलाई बाढीसम्बन्धी सूचना प्राप्त गर्दा आधिकारिक स्रोतलाई मात्र विश्वास गर्न र आवश्यक सतर्कता अपनाउन आग्रह गरिएको छ।

अफवाहभन्दा आधिकारिक सूचना विश्वास गर्न आग्रह

रसुवा र नुवाकोटलगायत त्रिशूली नदी आसपासका क्षेत्रमा हालै आएको विनाशकारी बाढीपछि स्थानीयवासी त्रसित रहेका बेला सामाजिक सञ्जालमा फेरि ठूलो बाढी आउने भन्दै विभिन्न अपुष्ट सूचना फैलिएका छन्।

महाशाखाले नदीहरूको बहाव र मौसमको अवस्थालाई निरन्तर निगरानीमा राखिएको जनाएको छ। कुनै पनि आपत्कालीन अवस्था सिर्जना हुने संकेत देखिएमा सम्बन्धित निकायमार्फत तत्काल सूचना सार्वजनिक गरिने बताइएको छ।

महाशाखाले नागरिकलाई हल्ला र त्रास फैलाउने सूचनाबाट प्रभावित नहुन, तर आधिकारिक चेतावनीलाई गम्भीरतापूर्वक लिन आग्रह गरेको छ।

Originally published on abcnews.com.np.