चितवन । रसुवा जिल्लालगायत आसपासका क्षेत्रमा आएको विनाशकारी बाढी तथा पहिरोमा बेपत्ता भएका व्यक्तिका शव नारायणी नदी हुँदै चितवनसम्म आइपुग्न थालेपछि शव व्यवस्थापन चुनौतीपूर्ण बनेको छ। नदी किनारमा लगातार शव फेला पर्न थालेपछि जिल्ला प्रशासन कार्यालय चितवनले थप शव सुरक्षित राख्न अस्थायी कोल्ड स्टोर सञ्चालन गर्ने तयारी थालेको छ।

हाल चितवनमा करिब ५० वटा शव राख्न सकिने क्षमता रहेको भए पनि पछिल्लो समय नारायणी नदी किनारका विभिन्न स्थानमा एकैपटक चारदेखि पाँच वटासम्म शव फेला पर्न थालेपछि उपलब्ध स्थान अपर्याप्त हुन सक्ने देखिएको प्रमुख जिल्ला अधिकारी गणेश अर्यालले जानकारी दिएका छन्।

प्रशासनले शवको संख्या थपिँदै गएमा व्यवस्थापनमा समस्या नहोस् भन्ने उद्देश्यले प्रयोगविहीन सरकारी भवनलाई अस्थायी कोल्ड स्टोरका रूपमा प्रयोग गर्ने योजना अघि बढाएको छ। तत्कालीन कृषि सामग्री केन्द्रको भवनमा आवश्यक तापक्रम कायम गरी शव सुरक्षित राख्ने व्यवस्था मिलाउन प्राविधिक तयारी भइरहेको जनाइएको छ।

नदी किनारमा सुरक्षा टोलीको खोजी अभियान

नारायणी नदी किनारमा तैरिएर आएका शवको खोजी, उद्धार तथा व्यवस्थापनका लागि नेपाल प्रहरी, सशस्त्र प्रहरी बल, नेपाली सेना र भरतपुर महानगरपालिकाको नगर प्रहरी परिचालन गरिएको छ।

सुरक्षाकर्मीका अनुसार बिहीबार बिहानदेखि नारायणी नदीमा विभिन्न स्थानमा शव तैरिरहेको अवस्थामा देखिन थालेका हुन्। रसुवा तथा आसपासका बाढी प्रभावित क्षेत्रबाट बेपत्ता भएका व्यक्तिका शव नदीको तीव्र बहावसँगै तल्लो तटीय क्षेत्र हुँदै चितवनसम्म आइपुगेको अनुमान गरिएको छ।

पहिचान र हस्तान्तरणको प्रक्रिया अघि बढाइने

फेला परेका शवलाई सुरक्षित रूपमा संकलन गरी पहिचानका लागि आवश्यक प्रक्रिया अघि बढाइने प्रशासनले जनाएको छ। शवको पहिचान भएपछि सम्बन्धित परिवारलाई हस्तान्तरण गर्ने व्यवस्था मिलाइनेछ।

बाढी प्रभावित क्षेत्रमा अझै खोजी तथा उद्धार कार्य जारी रहेकाले आगामी दिनमा थप शव फेला पर्ने सम्भावनालाई समेत ध्यानमा राख्दै चितवन प्रशासनले वैकल्पिक शव व्यवस्थापन स्थलको तयारी तीव्र पारेको छ।

Originally published on abcnews.com.np.