काठमाडौं । भोटेकोशी नदीमा आएको बाढीले रसुवा भन्सार कार्यालयका १५ जना कर्मचारी बेपत्ता भएका छन् । विभागले उद्धार टोली परिचालन गरेको छ ।

भन्सार विभागका सूचना अधिकारी किशोर बर्तौलाका अनुसार, सो कार्यालयमा कार्यरत ४० मध्ये २५ जना कर्मचारी सम्पर्कमा आएका छन् । प्रमुख भन्सार प्रशासक राजेन्द्र ढुंगानासहितको समूह सुरक्षित रहेको बताइएको छ, तर बाँकी १५ जना भने अझै सम्पर्कविहीन छन् ।

बेपत्ता भएका कर्मचारीहरूको नामावली सार्वजनिक गरिएको छ। सो सूचीमा नहकुल शर्मा, राजेन्द्रकुमार सोनकर, विकास तामाङ, विष्णुप्रसाद भुसाल, भीमबहादुर लामा, दिनेश घिमिरे, अनिता पुरी, प्रेमप्रसाद सेढाई, गोविन्द अधिकारी, सुनिल गुरुङ, नरेशदत्त जोशी, राजु ओली, राम नेपाली, विमल त्रिपाठी र हरिबहादुर खड्का छन् ।

उपचार तथा सम्पर्क

सूचना अधिकारी बर्तौलाले जानकारी दिए अनुसार, सम्पर्कमा आएका २५ मध्ये २ जना कर्मचारीको नर्भिक अस्पतालमा उपचार भइरहेको छ । अन्य ११ जना काठमाडौं आइपुगेका हुन् र उनीहरूको स्वास्थ्य सामान्य रहेको बताइएको छ ।

बेपत्ता भएका कर्मचारीका परिवारजनलाई सहयोग गर्न विभागले सम्पर्क अधिकृतहरू तोकेको छ । कुमार घिमिरे (शाखा अधिकृत) ९८४१३६५९४८, भरतमणि सापकोटा (शाखा अधिकृत) ९८४९६४५०३० र शिवराज बोहरा (शाखा अधिकृत) ९८४९९३२२०२ मा सम्पर्क गर्न विभागले आग्रह गरेको छ ।

उद्धार टोली परिचालन

बाढीले बेपत्ता भएका कर्मचारीको खोजी तथा उद्धारका लागि भन्सार विभागले विशेष टोली खटाएको छ । उनीहरूले घटनास्थलबाट जानकारी सङ्कलन गर्ने र परिवारजनलाई आवश्यक सहयोग पु¥याउने कार्य गरिरहेका छन् ।

Originally published on abcnews.com.np.