काठमाडौं । एक्स्ट्रीम इनर्जी ड्रिंक्सले विनाशकारी बाढीबाट प्रभावित नागरिकहरूको उद्धार, राहत र पुन:स्थापनाका लागि १ करोड रूपैयाँ सहयोग गर्ने घोषणा गरेको छ ।

रसुवा जिल्लाको भोटेकोशी नदीमा आएको आकस्मिक बाढी र त्यसपश्चात् उत्पन्न विपद्लाई ध्यानमा राख्दै कम्पनीले उक्त रकम ‘प्रधानमन्त्री दैवीप्रकोप उद्धार कोष’ मार्फत प्रदान गर्ने निर्णय लिएको हो ।

एक्स्ट्रीम इनर्जी ड्रिंक्सले विज्ञप्ति जारी गर्दै बाढी प्रभावित परिवार र नागरिकहरूको पीडा कम गर्न तथा सरकारको राहत एवं पुन:स्थापना कार्यमा ऐक्यबद्धता जनाउन सहयोग गरिएको बताएको छ ।

शोक व्यक्त र सम्मान

विपद्को यस समयमा एक्स्ट्रीम इनर्जी ड्रिंक्सले प्राकृतिक प्रकोपमा परी ज्यान गुमाउनेहरूप्रति श्रद्धाञ्जली व्यक्त गर्दै शोक सन्तप्त परिवारजनलाई समवेदना प्रकट गरेको छ । साथै, घटनामा घाइते भएकाहरूको शीघ्र स्वास्थ्य लाभको कामना पनि गरेको छ ।

कम्पनीले आफ्नो ज्यानको जोखिम मोलेर कार्यक्षेत्रमा निरन्तर खटिएका सुरक्षाकर्मी, स्वास्थ्यकर्मी, स्वयंसेवक, स्थानीय समुदाय तथा सरकारी र गैरसरकारी निकायहरूको योगदानको उच्च सम्मान व्यक्त गरेको छ ।

सामाजिक उत्तरदायित्व

आफ्नो संस्थागत सामाजिक उत्तरदायित्व (CSR) लाई प्राथमिकतामा राख्दै आएको एक्स्ट्रीम इनर्जी ड्रिंक्सले राष्ट्रलाई परेको हरेक संकटपूर्ण परिस्थितिमा नागरिक र समुदायको साथमा उभिने प्रतिबद्धता जनाएको छ । कम्पनीले यसअघि पनि विभिन्न सामाजिक कार्यहरूमा सक्रिय सहभागिता जनाउँदै आएको जानकारी दिएको छ।

Originally published on abcnews.com.np.