काठमाडौं । भोटेकोसी नदीमा आएको विनाशकारी बाढीका कारण अवरुद्ध भएका सञ्चार सम्पर्कलाई पुनर्स्थापित गर्न नेपाल टेलिकमले आवश्यक मर्मतसम्भार तथा उपकरण परिचालनको काम तीव्र बनाएको छ।

रसुवा जिल्लाका विभिन्न स्थानमा सञ्चार सेवा सञ्चालन गर्न कम्पनीले न्यौपानेचौर तथा राम्चे रिपिटर साइटमा हेलिकोप्टरमार्फत जेनेरेटर, ब्याट्रीलगायत आवश्यक उपकरण पठाएको जनाएको छ।

ती उपकरणको प्रयोगबाट न्यौपानेचौर र राम्चे आसपासका विभिन्न क्षेत्रमा सञ्चार सेवा पुनः सञ्चालनमा ल्याइएको टेलिकमले जनाएको छ।

यी क्षेत्रमा सुचारु भयो सेवा

नेपाल टेलिकमका अनुसार केस्पाङ (काउले), ठुलेगाउँ, तादी, फिकुरी, कालिकास्थान, ग्राङ, डाँडागाउँ, मैलुङ, पाङसाङ डाँडा, लाङटाङ तथा क्याङ्जिनलगायत क्षेत्रमा सञ्चार सेवा सुचारु गरिएको छ।

यस्तै, धुन्चेमा पनि सञ्चार सेवा सञ्चालन गर्न आवश्यक जेनेरेटर, इन्धन तथा प्राविधिक कर्मचारी परिचालन गरिएको कम्पनीले जनाएको छ।

नुवाकोटका मदनपुर, बट्टार र विदुर बसपार्क तथा धादिङ जिल्लाअन्तर्गत बैरेनी र ठमेलडाँडामा समेत जेनेरेटर, इन्धन र आवश्यक जनशक्तिसहित सेवा पुनः सञ्चालन गर्ने तयारी भइरहेको छ।

६० साइट अझै सञ्चालनमा आउन बाँकी

प्रभावित क्षेत्रमा प्राथमिकता प्राप्त सञ्चार साइटहरूलाई निरन्तर सञ्चालनमा ल्याउन आवश्यक उपकरण तथा जनशक्ति परिचालन गरिएको नेपाल टेलिकमले जनाएको छ। हाल सञ्चालनमा रहेका बीटीएस टावरहरूको कभरेज तथा क्षमता विस्तार गरी सेवालाई थप प्रभावकारी बनाउने काम पनि भइरहेको छ।

टेलिकमका अनुसार चितवनका ५ मध्ये ३, धादिङका ३६ मध्ये १३, नुवाकोटका ७९ मध्ये ३१ तथा रसुवाका ३२ मध्ये १३ साइट सञ्चालनमा आउन बाँकी छन्।

चार जिल्लाका कुल १५२ साइटमध्ये हालसम्म ६० वटा साइट पुनः सञ्चालन हुन बाँकी रहेको कम्पनीले जनाएको छ। बाँकी सञ्चार साइटलाई पनि आवश्यक उपकरण, इन्धन र प्राविधिक जनशक्ति परिचालन गरी यथाशीघ्र सञ्चालनमा ल्याउने प्रयास भइरहेको नेपाल टेलिकमले जनाएको छ।

Originally published on abcnews.com.np.