काठमाडौं । प्रधानमन्त्री बालेन्द्र शाहले भोटेकोशी बाढीबाट प्रभावित नुवाकोटको विदुर तथा आसपासका क्षेत्रको स्थलगत निरीक्षण गरी काठमाडौं फर्किनुभएको छ।

प्रधानमन्त्री शाह बिहान ९ः३० बजे पूर्वाधार विकासमन्त्री सुनिल लम्सालसहित सडकमार्ग हुँदै नुवाकोट पुग्नुभएको थियो। उहाँले बाढी प्रभावित बस्ती तथा क्षेत्रमा पुगेर भौतिक क्षति र स्थानीय अवस्थाको अवलोकन गर्नुभएको हो।

प्रधानमन्त्री शाहको टोलीले बाढीबाट भएको क्षतिको निरीक्षण गर्नुका साथै स्थानीय प्रशासन, सुरक्षा निकाय र जनप्रतिनिधिसँग उद्धार, राहत तथा पुनःस्थापनाका विषयमा छलफल गरेको थियो।

निरीक्षणका क्रममा प्रधानमन्त्री शाहले विस्थापित परिवारलाई तत्काल राहत उपलब्ध गराउन, अवरुद्ध सडक तथा अन्य अत्यावश्यक पूर्वाधार शीघ्र सञ्चालनमा ल्याउन र दीर्घकालीन पुनःस्थापनाको काम अघि बढाउन सम्बद्ध निकायलाई निर्देशन दिनुभएको छ।

बुधबार रसुवाको भोटेकोशी नदीमा आएको भीषण बाढीले नदी तटीय क्षेत्रका बस्ती, सडक, पुल, विद्युत् तथा अन्य पूर्वाधारमा ठूलो क्षति पुर्‍याएको छ। बाढीपछि प्रधानमन्त्री शाहले उद्धार तथा राहत कार्यलाई प्रभावकारी बनाउन उच्चस्तरीय बैठकमार्फत सम्बन्धित निकायलाई आवश्यक निर्देशन दिँदै आउनुभएको छ।

स्थानीयवासीसँग भेटघाट

प्रधानमन्त्री शाहले विदुर नगरपालिका तथा आसपासका प्रभावित क्षेत्रमा स्थानीयवासीसँग भेटघाट गरी उनीहरूको अवस्था र समस्याबारे जानकारी लिनुभएको थियो।

उहाँले तत्काल आवश्यक राहत तथा सहयोग उपलब्ध गराउन स्थानीय प्रशासनलाई निर्देशन दिनुभएको छ। साथै, सुरक्षाकर्मी तथा स्थानीय प्रशासनसँग छलफल गर्दै खोजी, उद्धार र राहत वितरणलाई थप व्यवस्थित र प्रभावकारी बनाउन आग्रह गर्नुभएको छ।

Originally published on abcnews.com.np.