काठमाडौँ । काठमाडौँको दक्षिणकाली नगरपालिका–५ स्थित फर्पिङ चेकपोस्टबाट प्रहरीले खैरो हेरोइनजस्तो देखिने पदार्थसहित दुई जनालाई पक्राउ गरेको छ।

इलाका प्रहरी कार्यालय फर्पिङबाट खटिएको प्रहरी टोलीले बिहीबार बिहान करिब २ः४५ बजे वीरगन्जबाट काठमाडौँ आउँदै गरेको बा ९९ प ३०६ नम्बरको मोटरसाइकल चेकजाँच गर्ने क्रममा उनीहरूलाई पक्राउ गरेको हो।

पक्राउ पर्नेमा काभ्रेपलाञ्चोकको नमोबुद्ध नगरपालिका–९ घर भई हाल भक्तपुरको मध्यपुर थिमि बस्ने २७ वर्षीय साजन तामाङ र नमोबुद्ध नगरपालिका–१० घर भई मध्यपुर थिमिमै बस्ने २८ वर्षीय विशाल देवकोटा रहेका छन्।

प्रहरीका अनुसार उनीहरूको साथबाट ५.२६ ग्राम खैरो हेरोइनजस्तो देखिने पदार्थ बरामद भएको छ।

पदार्थसहित पक्राउ परेका दुवै जनामाथि लागुऔषधसम्बन्धी कसुरमा अनुसन्धान भइरहेको प्रहरीले जनाएको छ। काठमाडौँ जिल्ला अदालतबाट सात दिनको म्याद थप अनुमति लिएर प्रहरी वृत्त कीर्तिपुरले उनीहरूमाथि थप अनुसन्धान गरिरहेको हो।

प्रहरीले अनुसन्धान पूरा गरी लागुऔषधसम्बन्धी कसुरमा आवश्यक कानुनी कारबाही अघि बढाउने जनाएको छ।

Originally published on abcnews.com.np.