काठमाडौँ । बाढी तथा पहिरोबाट प्रभावित नागरिकको उद्धार, राहत र पुनर्स्थापनाका लागि एक्स्ट्रिम इनर्जी ड्रिङ्क्सले घोषणा गरेको रु. १ करोड सहयोग आज नेपाल सरकारका अर्थमन्त्रीलाई हस्तान्तरण गरिएको छ।

विपद्को कठिन समयमा सरकारसँग ऐक्यबद्धता जनाउँदै एक्स्ट्रिम इनर्जी ड्रिङ्क्सले प्रभावित नागरिकको राहत तथा पुनर्स्थापनामा सहयोग पुर्याउने उद्देश्यले सो रकम प्रधानमन्त्री दैवी प्रकोप उद्धार कोषमा बुझाएको हो।

एक्स्ट्रिम इनर्जी ड्रिङ्क्सले विपद्बाट प्रभावित सम्पूर्ण नागरिकप्रति ऐक्यबद्धता व्यक्त गर्दै उद्धार तथा राहत कार्यमा खटिएका सुरक्षाकर्मी, स्वास्थ्यकर्मी, स्वयंसेवक र सम्बन्धित निकायप्रति सम्मान व्यक्त गरेको छ। कम्पनीले भविष्यमा पनि राष्ट्र र नागरिकको हितमा आवश्यक सहयोग र सहकार्य जारी राख्ने प्रतिबद्धता जनाएको छ।

सहयोगको विवरण

एक्स्ट्रिम इनर्जी ड्रिङ्क्सले बाढी र पहिरोका कारण समस्यामा परेका नागरिकलाई तत्कालै राहत प्रदान गर्न रु. १ करोड बराबरको सहयोग उपलब्ध गराएको हो। अर्थमन्त्री समक्ष रकम हस्तान्तरण गर्दा कम्पनीका प्रतिनिधिहरू उपस्थित थिए। यस सहयोगले विपद् प्रभावित क्षेत्रमा राहत वितरण र पुनर्स्थापना कार्यलाई गति दिने अपेक्षा गरिएको छ।

Originally published on abcnews.com.np.