रसुवाको बाढीमा ७०० भन्दा बढी गाडी बगेको प्रारम्भिक अनुमान

काठमाडौं । रसुवामा आएको विनाशकारी बाढीले चीनबाट नेपाल ल्याइँदै गरेका ७०० भन्दा बढी सवारी साधन बगाएको प्रारम्भिक अनुमान गरिएको छ। दशैं–तिहारलाई लक्षित गरी तथा हालै सम्पन्न नाइमा एक्स्पो र जारी नाडा अटो शोमा बुकिङ भएका ग्राहकलाई वितरण गर्न ल्याइएका गाडी बाढीमा परेका हुन्।

अटो व्यवसायीहरूका अनुसार रसुवा नाकाबाट नेपाल भित्रिने क्रममा रहेका सयौं गाडी चालकसहित बाढीमा परेका छन्। सडकखण्डसमेत बाढीले बगाएपछि गाडीको अवस्था र चालकहरूको अवस्थाबारे यकिन जानकारी आउन सकेको छैन।

बीवाईडीका मात्रै २०० भन्दा बढी गाडी प्रभावित

बाढीबाट नेपालका लागि बीवाईडीको आधिकारिक विक्रेता साइमेक्स इंक सबैभन्दा बढी प्रभावित भएको छ। कम्पनीकी प्रबन्ध निर्देशक यमुना श्रेष्ठका अनुसार रसुवा नाकाबाट नेपाल भित्रिने तयारीमा रहेका २०० भन्दा बढी बीवाईडी गाडी बाढीमा प्रभावित भएका छन्।

उनका अनुसार गाडी र चालकहरू अहिले कहाँ र कुन अवस्थामा छन् भन्ने यकिन जानकारी छैन। कम्पनीले चालकहरूसँग सम्पर्क गर्ने प्रयास गरिरहेको जनाएको छ।

एमजीका करिब १०० गाडी सम्पर्कविहीन

एमजी गाडीको आधिकारिक विक्रेता पारामाउन्ट मोटर्सका पनि करिब १०० गाडी प्रभावित भएका छन्। कम्पनीका महाप्रबन्धक सुनिलबहादुर क्षत्रीले बाढीले कति गाडी बगायो भन्ने यकिन नभए पनि नेपाल भित्रिने तयारीमा करिब १०० गाडी रहेको बताए।

गाडीसहित नेपालतर्फ आइरहेका केही चालकसँगसमेत सम्पर्क हुन नसकेको उनले जानकारी दिए।

त्यस्तै, एमएडब्लू वृद्धिले आयात गरेका डोङफेङ ब्रान्डका १५० भन्दा बढी गाडी बाढीले बगाएको बताइएको छ। लक्ष्मी ग्रुपले चीनबाट ल्याइरहेका बीएआईसी, आर्कफक्स र जेटोरका गरी ४० देखि ५० वटा गाडी बाढीमा परेको अनुमान गरिएको छ।

व्यवसायीहरूका अनुसार ओमोडाका ६५, फोटोनका ६० वटा गाडी पनि बाढीबाट प्रभावित भएका छन्। स्काइवेल, म्याक्सस, अवतार, चेरीलगायत अन्य चिनियाँ ब्रान्डका सवारी साधनसमेत क्षतिग्रस्त भएको बताइएको छ।

रसुवा नाकामै बढ्दो निर्भरता

चीनबाट सवारी साधन आयात गर्ने व्यवसायीहरूका लागि रसुवा नाका प्रमुख प्रवेशद्वारका रूपमा रहँदै आएको छ। तातोपानी नाका पटक–पटक अवरुद्ध हुने र कोरला नाका भौगोलिक रूपमा कठिन तथा काठमाडौंका लागि तुलनात्मक रूपमा टाढा भएकाले व्यवसायीहरूले रसुवा नाकालाई प्राथमिकता दिँदै आएका छन्।

गत असार ३१ गतेदेखि अवरुद्ध तातोपानी नाका भदौ ९ गतेदेखि सञ्चालनमा आए पनि यसको नियमितता र क्षमता अझै चुनौतीपूर्ण रहेको व्यवसायीहरूको भनाइ छ।

४० किलोमिटरभन्दा बढी सडक ध्वस्त

हालैको बाढीले रसुवा भन्सार कार्यालयसहित ४० किलोमिटरभन्दा बढी सडक पूर्ण रूपमा क्षतिग्रस्त भएको छ। सडक तथा अन्य भौतिक पूर्वाधारमा भएको क्षतिका कारण रसुवा नाका तत्कालै सञ्चालनमा आउने सम्भावना न्यून देखिएको छ।

नाका लामो समय अवरुद्ध भएमा चिनियाँ सवारी साधन आयात गर्ने व्यवसायीले वैकल्पिक रूपमा तातोपानी वा कोरला नाका प्रयोग गर्नुपर्ने अवस्था आउन सक्छ। तर दुवै नाकाको क्षमता र पूर्वाधारका कारण ठूलो परिमाणमा सवारी आयात तत्काल व्यवस्थापन गर्न चुनौतीपूर्ण हुने व्यवसायीहरूको भनाइ छ।

सरकारसँग क्षतिपूर्तिको माग

बाढीले अर्बौं रुपैयाँ बराबरका सवारी साधनसँगै भन्सार कार्यालय, सडक र अन्य पूर्वाधारमा समेत ठूलो क्षति पुर्‍याएको छ। नाका पुनः सञ्चालन गर्न लामो समय लाग्ने अवस्था देखिएपछि अटो व्यवसायीहरूले क्षतिको मूल्यांकन, क्षतिपूर्ति तथा नाका र सडकको शीघ्र पुनःस्थापनाका लागि सरकारसँग सहयोग माग गरेका छन्।

Originally published on abcnews.com.np.