चिनियाँ पक्षबाट ताल फुटेको जानकारी आएलगत्तै अध्यक्ष तामाङसहितको टोली हेलिकप्टरमार्फत रसुवागढीसम्म पुगेको हो। रसुवाका प्रमुख जिल्ला अधिकारी नरेन्द्र परियारले पनि चिनियाँ पक्षबाट ताल फुटेको सूचना आएको पुष्टि गर्नुभएको छ।

रसुवागढीसम्मको अवस्था तत्काल सामान्य देखिएको अध्यक्ष तामाङले बताउनुभयो। ‘हेलिकप्टरमा रसुवागढीसम्म पुगेँ। त्यहाँसम्म खोला त्यति बढेको देखिँदैन। तर अलिकति सचेत त हुनैपर्छ,’ उहाँले भन्नुभयो।

उहाँका अनुसार चीनतर्फ सीमा सुरक्षामा खटिएका सुरक्षाकर्मीलाई समेत तत्काल सुरक्षित स्थानतर्फ सारिएको जानकारी आएको छ। तर ताल फुटेको अवस्था, पानीको मात्रा र त्यसबाट नेपालतर्फ पर्ने सम्भावित प्रभावबारे विस्तृत विवरण अझै आइसकेको छैन।

नेपालतर्फ तत्काल ठूलो प्रभाव देखिएन

चीनतर्फ ताल फुटेको सूचनापछि नेपाली सुरक्षा तथा प्रशासनिक निकायले भोटेकोसी र त्रिशूली नदीको तल्लो तटीय क्षेत्रमा सतर्कता बढाएका छन्। नेपाल प्रहरीले समेत सम्भावित पुनःबाढीको जोखिमलाई ध्यानमा राख्दै प्रभावित नागरिक, उद्धारकर्ता तथा सुरक्षाकर्मीलाई सुरक्षित स्थानमा रहन आग्रह गरेको छ।

अध्यक्ष तामाङका अनुसार हालसम्म नेपालतर्फ तत्काल ठूलो प्रभाव देखिएको छैन। यद्यपि रातिको समय, यसअघि नै बाढीबाट प्रभावित क्षेत्र र उद्धार तथा राहतमा खटिएका टोलीको उपस्थितिका कारण थप सावधानी आवश्यक रहेको उहाँले बताउनुभयो।

चीनको छोचेन खोला र पुरेपू त्साङ्पो नदीको संगम छेउमा पहिरोका कारण बनेको तालमा बिहीबारसम्म करिब २० लाख घनमिटर पानी जम्मा भएको थियो। ताल फुटेपछि त्यसको पानी भोटेकोसी नदीतर्फ आउन सक्ने भएकाले तल्लो तटीय क्षेत्रमा जोखिम बढ्न सक्ने प्रशासनले जनाएको छ।

ताल फुटेको सूचना आएपछि घटनास्थलको वास्तविक अवस्था, पानीको बहाव र नेपालतर्फ पर्ने प्रभावबारे थप विवरण संकलन तथा निगरानी भइरहेको छ।