काठमाडौं । नेपाली कांग्रेसका उपसभापति विश्वप्रकाश शर्माले १५ औँ महाधिवेशन रोक्न सर्वोच्च अदालतबाट अन्तरिम आदेश जारी नभएपछि अब सबै कांग्रेसजन विगतका विगतका विमति भुलेर एकताबद्ध बन्नुपर्ने बताएका छन्।

रसुवाको बाढीले खडा गरेको विपदमा मानवीय जिम्मेवारी पूरा गर्दै महाधिवेशन पूर्वनिर्धारित तयारीमा जुट्नुपर्ने बताएका छन्।

उनले भने, ‘रसुवाको बाढीले खडा गरेको विपद्ले सिङ्गो देश मर्माहत भएको यो बेला हाम्रो पहिलो र प्रधान कर्तव्य यही जिम्मेवारीमा केन्द्रित रहने हो। अनि दोस्रो दायित्व १५ औँ महाधिवेशनतर्फ अघि बढ्ने, सर्वोच्च अदालतले अन्तरिम आदेश दिन अस्वीकार गरेपश्चात् हामी सहमत, असहमत कोही कसैमा पनि यसबारे अब कुनै अलमल रहनुहुन्न।’

जलवायु परिवर्तनका कारण यो भूगोलमा ४७ वटा हिमताल कुनै पनि बेला विस्फोट हुन सक्ने गम्भीर जोखिमको स्थितिमा रहेको बताएका छन्।

उनले थपेका छन्, ‘केवल एउटा नमुना मात्रै हो तिब्बती भूमिमा भएको कुनै हिमतालको यो पछिल्लो विस्फोट। तत्पश्चात्को भीषण बाढी अनि त्यसमा परेर हाम्रा कैयौँ आफन्त अनि कैयौँ पर्यटकको मृत्यु, अरबौँको भौतिक क्षति, हामीलाई यसले गम्भीर चोट दिएको छ। नेपाल देशले कार्बन उत्सर्जन कम गर्ने साना राष्ट्रहरूको नेतृत्व गरेर ठूला राष्ट्रहरूसँग गहन संवाद र दबाबको नेतृत्व अब अन्तर्राष्ट्रिय मञ्चहरूमा गर्नैपर्छ।’

उनले विपद्को बेलामा सरकारमा रहेका, नरहेका सबै दल एक भएर जुट्नैपर्ने बताए।

उनले थपेका छन्, ‘यो समयमा सबै जुट्दै गर्दा हामी कांग्रेसजनले पनि विगतका सबै तीता-नमिठा कुरा बिर्सिएर अघि बढ्ने हृदय राख्न सक्नुपर्छ। मान्छेका घरभित्र या राजनीतिक दलहरूभित्र विवादहरू हुन्छन्। तर निश्चित विधिको बाटोबाट त्यो एक हदसम्म टुङ्गोमा पुगेपछि निश्चित विषयमा हामी असहमत छौँ, तर सँगै बढ्न सहमत छौँ भन्ने समयोचित परिपक्वता समयले खोजिरहेकै छ।’

देशमा अनेक विषय र अनेकन् विषमताको बेलामा जिम्मेवार राजनीतिक दल नेपाली कांग्रेसले आन्तरिक विषयमा मात्रै अल्झिएर आफ्नो महत्त्वपूर्ण समय खेर फाल्नु नहुने बताए। उनले दुई खाले मतका बीच विधानको १७ (२) बमोजिम विशेष महाधिवेशन भएको स्मरण गरेका छन्।

उनले सबैलाई समेट्नकै लागि २२ दिन लागि महाधिवेशन कार्यतालिका धकेलिएको उल्लेख गरेका छन्। उनले फेरि तीन महिना अघिको सात बुँदे प्रस्ताव पढेर पार्टी कार्यालयको कोठाबाट सहमतिमा आउन आग्रह गरे।

उनले थपेका छन्, ‘केवल घरायसी विषयमा अलमलिएर बस्ने छुट हामी कोही पनि कांग्रेसजनलाई अब हुनुहुन्न। रसुवाको बाढीले खडा गरेको विपद् झैँ अरू थुप्रै विषयले हाम्रो ऐक्यबद्ध र जिम्मेवारीपूर्ण भूमिका प्रतीक्षा गरिरहेका छन्।’

Originally published on abcnews.com.np.