अर्थ मन्त्रालयलाई प्राप्त पछिल्लो विवरणअनुसार बुधबार मध्याह्नदेखि बिहीबार राति १२ बजेसम्म कोषमा १ अर्ब ९१ करोड ८६ लाख ५० हजार ९११ रुपैयाँ सहयोग थपिएको हो ।

यससँगै कोषमा जम्मा भएको कुल रकम ४ अर्ब ९ करोड ११ लाख ६० हजार ६७० रुपैयाँ पुगेको छ । यसअघि कोषमा २ अर्ब १७ करोड २५ लाख ९ हजार ७५९ रुपैयाँ रहेको थियो ।

नेपाल–चीन सीमा क्षेत्रमा बुधबार भोटेकोशी नदीमा आएको भीषण बाढीले ठूलो जनधनको क्षति पुर्‍याएपछि सरकारले प्रभावित क्षेत्रलाई संकटग्रस्त क्षेत्र घोषणा गरेको थियो । त्यसपछि बाढीपीडितको उद्धार तथा राहतका लागि विभिन्न व्यक्ति तथा संस्थाले कोषमा सहयोग रकम जम्मा गर्न थालेका हुन् ।

सरकारले प्रधानमन्त्री दैवी प्रकोप उद्धार कोषमा रकम संकलन तथा समन्वयका लागि अर्थ मन्त्रालयलाई फोकल मन्त्रालयको जिम्मेवारी दिएको छ ।

अर्थमन्त्री डा. स्वर्णिम वाग्लेले संस्थागततर्फ १ करोड रुपैयाँ वा सोभन्दा बढी सहयोग गर्ने दाताबाट रकम आफैँमार्फत स्वीकार गरिरहनुभएको छ । व्यक्तिगततर्फ भने इच्छुक दाताले मन्त्रालयमै पुगेर सहयोग रकम उपलब्ध गराउन सक्ने व्यवस्था गरिएको छ ।

बिहीबार मात्रै ६ घण्टाको अवधिमा निजी क्षेत्रका विभिन्न दाताले अर्थ मन्त्रालयमा पुगेर २७ करोड ३३ लाख रुपैयाँ कोषमा सहयोग गरेका थिए ।