काठमाडौं  । रसुवाको गोसाईंकुण्ड गाउँपालिका–२ टिमुरेमा भोटेकोशी बाढीका क्रममा माटोमुनि पुरिएकी ६ वर्षीया बालिकालाई सशस्त्र प्रहरीले जीवितै उद्धार गरेको छ।

बाढी प्रभावित क्षेत्रमा खोज तथा उद्धारमा खटिएको सशस्त्र प्रहरीको टोलीले माटोमुनिबाट बालिका रोइरहेको आवाज सुनेपछि तत्काल खोजी थालेको थियो। खोजीका क्रममा बालिकालाई माटोमुनि पुरिएको अवस्थामा फेला पारेर उद्धार गरिएको सशस्त्र प्रहरीले जनाएको छ।

उद्धारपछि बालिकालाई सशस्त्र प्रहरी बल नेपालको बोर्डर आउट पोस्ट टिमुरेमा ल्याइएको थियो। उनको अवस्था कमजोर हुँदै गएपछि थप उपचारका लागि हेलिकप्टरमार्फत काठमाडौं ल्याउने प्रयास गरिएको छ।

तर, रातको समय र प्रतिकूल मौसमका कारण बालिकालाई तत्काल काठमाडौं ल्याउन कठिनाइ भइरहेको प्रहरीले जनाएको छ।

भोटेकोशी बाढीबाट प्रभावित क्षेत्रमा बेपत्ता नागरिकको खोजी तथा उद्धारका लागि सशस्त्र प्रहरीसहित सुरक्षा निकायका टोली निरन्तर परिचालन भइरहेका छन्।

Originally published on abcnews.com.np.