तनहुँ । नेपाल विद्युत् प्राधिकरण तनहुँ वितरण केन्द्रले विद्युत् महसुल नतिर्ने ग्राहकको लाइन काटेर आर्थिक वर्ष २०८२/८३ मा दुई करोड दुई लाख ८३ हजार १०४ रुपैयाँ बक्यौता असुल गरेको छ ।

वितरण केन्द्रका अनुसार उक्त आर्थिक वर्षमा दुई करोड ५७ लाख ८८ हजार २८० रुपैयाँ विद्युत् महसुल उठ्न बाँकी थियो । बक्यौता तिरेपछि ७९४ ग्राहकको विद्युत् लाइन पुनः जडान गरिएको केन्द्रका इन्जिनियर डिलबहादुर आलेले जानकारी दिए ।

बक्यौता असुलीका लागि प्राधिकरणले नियमित रूपमा लाइन काट्ने अभियान सञ्चालन गर्दै आएको छ । आर्थिक वर्ष २०८१/८२ मा लाइन काटेर एक करोड २७ लाख १५ हजार ७८६ रुपैयाँ बक्यौता असुल गरिएको थियो । त्यस्तै, आर्थिक वर्ष २०८०/८१ मा एक हजार ४३६ ग्राहकको लाइन काटेर दुई करोड ६८ लाख ४५ हजार ७०० रुपैयाँ बक्यौता उठाइएको थियो ।

तनहुँ वितरण केन्द्रले आर्थिक वर्ष २०८२/८३ मा ८७ करोड ७६ लाख १३ हजार ७८७ युनिट विद्युत् बिक्री गरेको छ । विद्युत् बिक्रीबाट केन्द्रले एक अर्ब एक करोड ११ लाख १२ हजार १२६ रुपैयाँ आम्दानी गरेको इन्जिनियर आलेले बताए ।

सो अवधिमा एक हजार ८९५ नयाँ मिटर जडान गरिएको छ । त्यस्तै, ४९ वटा ट्रान्सफर्मर जलेपछि तिनको स्थानमा नयाँ ट्रान्सफर्मर जडान गरिएको छ भने विद्युत् आपूर्ति व्यवस्थापन सुधारका लागि १० वटा नयाँ लोड सेन्टर थप गरिएको केन्द्रले जनाएको छ ।

६ सबस्टेसन, चार हजार किलोमिटरभन्दा बढी वितरण लाइन

तनहुँ वितरण केन्द्रअन्तर्गत हाल छ वटा सबस्टेसन र ३० वटा ११ केभी फिडर सञ्चालनमा छन् । केन्द्रको सेवा क्षेत्रभित्र १०७ किलोमिटर ३३ केभी लाइन, ९३९ किलोमिटर ११ केभी लाइन तथा चार हजार ३२८ किलोमिटर ०–४/२३ केभी वितरण लाइन रहेका छन् ।

केन्द्रअन्तर्गत ६७३ वटा ट्रान्सफर्मर सञ्चालनमा छन् ।

वितरण केन्द्रले तनहुँका १० स्थानीय तहसँगै कास्कीको रुपा गाउँपालिका–३ र ४ का केही भाग, लमजुङको मध्यनेपाल नगरपालिकाका वडा नं. १ देखि ५ सम्म तथा नवलपुरका बौदीकाली र बुलिङटार गाउँपालिकाका केही क्षेत्रमा विद्युत् सेवा उपलब्ध गराउँदै आएको छ ।

तनहुँ वितरण केन्द्रमा स्थायी ६०, दैनिक ज्यालादारी ३७, सेवा करार ३४, गोटागन्ती १९ र सुरक्षाकर्मी २० गरी कुल १७० जना कर्मचारी कार्यरत छन् ।

केन्द्रले विद्युत् लाइन विस्तार, मर्मत, सम्भार, सुदृढीकरण तथा स्तरोन्नतिको काम गर्दै आएको छ । साथै आवश्यकताअनुसार विभिन्न क्षमताका लोड सेन्टर थप गर्ने, नयाँ मिटर जडान गर्ने तथा मिटरसम्बन्धी ग्राहकका गुनासो व्यवस्थापन गर्ने कामसमेत भइरहेको जनाएको छ ।

केन्द्रले ग्राहकलाई भरपर्दो, गुणस्तरीय र विश्वसनीय विद्युत् आपूर्ति सुनिश्चित गर्ने उद्देश्यले वितरण प्रणाली सुधार तथा पूर्वाधार विस्तारलाई निरन्तरता दिइरहेको जनाएको छ ।

Originally published on abcnews.com.np.