काठमाडौं । कैलाश मानसरोवर यात्राबाट फर्किएका आध्यात्मिक गुरु जगदिश वासुदेव (सद्गुरु) लाई तातोपानी नाका हुँदै काठमाडौं ल्याइएको छ ।

त्रिभुवन अन्तर्राष्ट्रिय विमानस्थल स्रोतका अनुसार सद्गुरुलाई शनिबार सिम्रिक एयरको हेलिकप्टरमार्फत काठमाडौं ल्याइएको हो ।

बाढी आएको समयमा सद्गुरु मानसरोवर क्षेत्रमा रहेका थिए । उनको इशा फाउन्डेसनले सञ्चालन गरेको कैलाश मानसरोवर यात्रामा सहभागी एउटा टोली भने रसुवामा आएको विनाशकारी बाढीपछि सम्पर्कविहीन भएको थियो ।

उक्त टोलीमा रहेका ८० जना तीर्थयात्री मानसरोवरबाट फर्किने क्रममा नेपाल–चीन सीमावर्ती क्षेत्रमा सम्पर्कविहीन भएका थिए ।

बाढी आएको भदौ १० गतेपछि सार्वजनिक गरिएको भिडियोमार्फत सद्गुरुले आफ्नो यात्रु टोली सम्पर्कविहीन भएको जानकारी दिएका थिए । उनले टोलीमा रहेका सदस्यहरूको संख्या तथा उनीहरूको राष्ट्रियताबारे समेत जानकारी दिएका थिए ।

सद्गुरुका अनुसार उक्त समूहमा अमेरिका, क्यानडा, अस्ट्रेलिया, बेलायत, जर्मनी, फ्रान्स, नेपालसहित २० देशका नागरिक सहभागी थिए । समूहमा ३४ पुरुष र ४६ महिला रहेको उनले बताएका थिए ।

नेपाल–चीन सीमावर्ती क्षेत्रमा आएको बाढीपछि सडक तथा अन्य यातायात सम्पर्क प्रभावित बनेकाले मानसरोवर यात्राबाट फर्किएका तीर्थयात्रीको खोजी तथा उद्धार चुनौतीपूर्ण बनेको थियो ।

सद्गुरु हरेक वर्ष नेपाल हुँदै कैलाश मानसरोवर यात्रा गर्दै आएका छन् । पछिल्लो विपद्का कारण प्रभावित तीर्थयात्रीको खोजी तथा उद्धारका लागि नेपाल र चीनतर्फका सम्बन्धित निकायले प्रयास जारी राखेका छन् ।

Originally published on abcnews.com.np.