काठमाडौं । बागमती प्रदेशका मुख्यमन्त्री किरण थापाले रसुवाको भोटेकोसी बाढीपछि देखिएको तीन तहका सरकारबीचको समन्वयसम्बन्धी समस्या समाधान भएको बताएका छन् ।

सोमबार रसुवामा बसेको संघीय प्रतिनिधिसभा सदस्य, प्रदेश सरकार, स्थानीय तह, प्रमुख जिल्ला अधिकारी तथा सुरक्षा निकायका प्रमुखहरूको बैठकले तीनै तहका सरकारबीच समन्वय गरी राहत, उद्धार तथा पुनःस्थापनाको काम अघि बढाउने सहमति गरेको उनले बताए ।

मुख्यमन्त्री थापाका अनुसार राहत वितरणदेखि सडक तथा बाटो जोड्ने र मर्मत गर्ने कामसम्मका लागि तीनै तहले आ–आफ्नो जिम्मेवारी बाँडफाँट गरेर अघि बढ्ने सहमति भएको छ ।

‘तीनै तहका सरकार मिलेर राहत वितरणदेखि बाटोहरू जोड्ने, मर्मत गर्ने गरी आ–आफ्नो जिम्मेवारी बाँडफाँट गरेर काम गर्ने कुरा भयो, आजबाट ग्याप फुलफिल भयो,’ उनले भने ।

यसअघि मुख्यमन्त्री थापाले आइतबार सत्तारूढ दल राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेटेर विपद् व्यवस्थापनमा तीन तहका सरकारबीच आवश्यक समन्वय हुन नसकेको गुनासो गरेका थिए ।

उक्त भेटमा लामिछानेले विपद्का बेला स्थानीय र संघीय सरकारबीच समन्वय गराउने भूमिका प्रदेश सरकारले खेल्नुपर्ने बताएका थिए । साथै उनले संघीय सरकारबाट आवश्यक सहयोग जुटाउन समन्वय गर्ने प्रतिबद्धता जनाएको मुख्यमन्त्री थापाले बताए ।

‘रास्वपा सभापति र प्रधानमन्त्रीज्यूका सल्लाहकारले तीनै तहको सरकार समन्वय गरेर जानुपर्छ भन्नुभयो । मलाई प्रदेशको लिड गर्ने गरी पठाउनुभएको छ,’ मुख्यमन्त्री थापाले भने ।

Originally published on abcnews.com.np.