काठमाडौं । कप्तान राफिन्हा र युवा स्टार लामिन यामलले दुई–दुई गोल गरेपछि साबिक विजेता बार्सिलोनाले स्पेनिस ला लिगामा लगातार तेस्रो जित निकालेको छ ।

सोमबार राति भएको खेलमा बार्सिलोनाले रायो भायकानोलाई ५–२ गोलले पराजित गरेको हो । घरेलु टोलीका लागि राफिन्हा र यामलले समान दुई गोल गरे भने एक गोल आत्मघाती उपहारका रूपमा प्राप्त भयो । भायकानोका दुवै गोल सर्जियो कामेलोले गरे ।

खेलको १२औँ मिनेटमा कामेलोले गोल गर्दै भायकानोलाई सुरुआती अग्रता दिलाएका थिए । तर, १९औँ मिनेटमा राफिन्हाले गोल गर्दै बार्सिलोनालाई खेलमा फर्काए ।

त्यसको दुई मिनेटपछि नै यामलले गोल गरेपछि बार्सिलोनाले २–१ को अग्रता बनायो । ५१औँ मिनेटमा भायकानोका डिफेन्डर फ्लोरियन लेजेउनेबाट आत्मघाती गोल भएपछि बार्सिलोनाले अग्रता ३–१ मा पुर्‍यायो ।

कामेलोले ५९औँ मिनेटमा व्यक्तिगत दोस्रो गोल गर्दै भायकानोलाई पुनः खेलमा फर्काउने प्रयास गरे । तर, ७१औँ मिनेटमा राफिन्हाले व्यक्तिगत दोस्रो गोल गरे । खेलको ९०औँ मिनेटमा यामलले पनि व्यक्तिगत दोस्रो गोल गरेपछि बार्सिलोनाले ५–२ को सहज जित पक्का गर्‍यो ।

लगातार तेस्रो जितसँगै बार्सिलोनाले तीन खेलबाट ९ अंक जोड्दै ला लिगाको शीर्ष स्थानमा उक्लिएको छ । भायकानोले भने तीन खेलबाट एक अंक मात्रै जोडेको छ र १८औँ स्थानमा छ ।

Originally published on abcnews.com.np.