काठमाडौं । भोटेकोसी नदीमा आएको भीषण बाढीको सातौँ दिन मंगलबार पनि प्रभावित क्षेत्रमा रहेका जलविद्युत् आयोजनाका सुरुङमा खोज तथा उद्धार कार्य जारी रहेको छ । भारतीय, चिनियाँ र दक्षिण कोरियाली विज्ञ तथा प्राविधिक टोलीको सहयोगमा नेपाली सेनाले विभिन्न जलविद्युत् आयोजनाका सुरुङमा खोजी तथा उद्धार गरिरहेको हो ।

नेपाली सेनाका अनुसार चिलिमे हाइड्रोपावरमा विदेशी प्राविधिकसहितको संयुक्त खोज तथा उद्धार टोली सुरुङभित्र प्रवेश गरी करिब ५० मिटरसम्म पुगेर खोजी गरेको छ । त्यस्तै लाङटाङ हाइड्रोमा टोली सुरुङभित्र करिब १५० मिटरसम्म प्रवेश गरी खोज तथा उद्धार कार्यमा जुटेको छ । अपर त्रिशूली–१ हाइड्रोमा पनि विदेशी विज्ञसहितको संयुक्त टोलीले सुरुङभित्र करिब २०० मिटरसम्म प्रवेश गरेर खोजी गरेको सेनाले जनाएको छ ।

त्रिशूली–३ ए आयोजनामा सुरुङको हेड फेला परेको र कम्प्रेसरमार्फत सुरुङभित्र हावा पठाउने काम भइरहेको छ । सुरुङभित्र जमेको पानी निकाल्ने कार्यसमेत जारी छ । तीनवटा एक्साभेटर प्रयोग गरी पछाडितर्फको वैकल्पिक मार्ग करिब १५ मिटर खोलिएको तथा रक ब्रेकरमार्फत सुरुङभित्र प्रवेश गर्ने स्थान बनाउन ढुंगा फुटाउने काम भइरहेको सेनाले जनाएको छ ।

त्रिशूली–३ बी आयोजनामा पनि विदेशी विज्ञसहितको टोली परिचालन गरिएको छ । सुरुङमा प्रवेश गर्ने द्वार पत्ता लगाएर एक्साभेटरको प्रयोग गरी भित्रतर्फ खन्ने काम भइरहेको छ ।

बाढीपछि तत्काल गरिएको उद्धारका क्रममा विभिन्न विद्युत् आयोजनाबाट २७९ जनाको जीवित उद्धार गरिएको नेपाली सेनाले जनाएको छ । जसमा रसुवागढीबाट दुई, माथिल्लो त्रिशूली–१ बाट ३३, माथिल्लो त्रिशूली–३ ए बाट २२१, माथिल्लो त्रिशूली–३ बीबाट दुई, मैलुङबाट नौ, नुवाकोट सौर्य विद्युत् आयोजनाबाट चार, त्रिशूली जलविद्युत् आयोजनाबाट तीन र देवघाट जलविद्युत् आयोजनाबाट पाँच जनाको उद्धार गरिएको छ ।

Originally published on abcnews.com.np.