खर्वाङ । बडिगाड गाउँपालिका–२ खर्वाङ वडा कार्यालयले गत आर्थिक वर्षमा कार्यान्वयन गरिएका योजनाको समीक्षा गरेको छ । वडा कार्यालयले गत आर्थिक वर्षमा १ करोड २५ लाख रुपैयाँ लागतका २५ योजनाको समीक्षा गरेको हो ।

वडा सचिव वसन्त घेत्मालका अनुसार कुल बजेटमध्ये ८७ लाख रुपैयाँ प्रदेश सरकारबाट र ३८ लाख रुपैयाँ पालिकाबाट विनियोजन भएको थियो । पालिकाबाट विनियोजित बजेटबाट २१ वटा तथा प्रदेशबाट विनियोजित बजेटबाट तीनवटा योजनामा काम भएको उनले जानकारी दिए । प्रदेशबाट विनियोजित पाँच लाख रुपैयाँको एउटा योजना भने कार्यान्वयन हुन नसकेको वडाध्यक्ष ढालप्रसाद शेरचनले बताए ।

कार्यक्रममा उपभोक्ता समितिका पदाधिकारीहरूले टुक्रे योजना बनाएर काम गर्नुभन्दा एउटै आयोजनामा पर्याप्त बजेट विनियोजन गरी त्यसबाट परिणाम आउने गरी काम गर्न सुझाव दिएका थिए । जिल्ला समन्वय समिति बागलुङका पूर्वउपप्रमुख विष्णुप्रसाद भुसाल र त्रिभुवन नमुना माध्यमिक विद्यालयका प्रधानाध्यापक ढालमणि भण्डारीले वडाले बजेटको न्यायोचित वितरण, लक्षित वर्गका लागि विनियोजित बजेटको प्रभावकारी उपयोग तथा आगामी दिनमा शिक्षा, स्वास्थ्य र रोजगारीलाई प्राथमिकता दिनुपर्नेमा जोड दिए ।

सो अवसरमा वडा कार्यालयका कर्मचारीको स्वागत तथा बिदाइसमेत गरिएको थियो । सामाजिक परिचालक विष्णु गिरी र प्राविधिक भरत विकलाई बिदाइ गरिएको वडा सदस्य सरस्वती रानाले जानकारी दिइन् । यस्तै नयाँ प्राविधिक रवीन्द्रनाथ रामलाई वडा कार्यालयले स्वागत गरेको छ ।

Originally published on abcnews.com.np.