काठमाडौं । विपद्का बेला घाइतेको उपचारमा सहजीकरण तथा मृतकका परिवारसँग समन्वय गर्न प्रहरीले अस्पताल र विमानस्थलमा ‘फोकल डेस्क’ स्थापना गरेको छ । साथै, घाइतेको उपचार भइरहेका तथा शव सङ्कलन गरिएका काठमाडौंसहित विभिन्न अस्पतालमा प्रहरी नायब उपरीक्षक (डीएसपी)को नेतृत्वमा विशेष प्रहरी टोली परिचालन गरिएको छ ।

प्रहरीका अनुसार वीर अस्पतालमा ३० जना, सिभिल अस्पतालमा १३ जना र काठमाडौं मेडिकल कलेजमा पाँच जना प्रहरी खटिएका छन् । त्रिभुवन शिक्षण अस्पतालमा भने प्रहरी नायब महानिरीक्षक (डीआईजी)को नेतृत्वमा ६२ जना प्रहरी परिचालन गरिएको छ ।

यस्तै, त्रिभुवन अन्तर्राष्ट्रिय विमानस्थलमा देशी तथा विदेशी नागरिकका शव व्यवस्थापन र घाइतेको विवरण सङ्कलन तथा समन्वयका लागि प्रहरी उपरीक्षक (एसपी)को नेतृत्वमा आठ सदस्यीय फोकल डेस्क स्थापना गरिएको छ ।

Originally published on abcnews.com.np.