काठमाडौं । रसुवामा निर्माणाधीन २१६ मेगावाट क्षमताको अपर त्रिशूली–१ जलविद्युत् आयोजनाको सुरुङमा सम्पर्कविहीन भएका कर्मचारी तथा प्राविधिकको उद्धारमा ढिलाइ भएको भन्दै आफन्तले गुनासो गरेका छन् । उनीहरूले बाढी आएको सातौँ दिनमा मात्रै उद्धार सुरु गरिएको भन्दै निर्माण कम्पनी र राज्यको भूमिकामाथि प्रश्न उठाएका हुन् ।

सम्पर्कविहीन कर्मचारी तथा प्राविधिकका आफन्त निर्माण कम्पनी नेपाल वाटर एन्ड इनर्जी डेभलपमेन्ट कम्पनीको कार्यालय पुगेर उद्धार कार्य तत्काल अघि बढाउन दबाब दिएका छन् । कम्पनीको कार्यालय पुगेका काँकडभिट्टाका कृष्ण खरेलले आयोजनामा कार्यरत कर्मचारी तथा प्राविधिकप्रति निर्माण कम्पनी र राज्य दुवैबाट पशुवत् व्यवहार भएको आरोप लगाए ।

उनका अनुसार बाढीले आयोजनाको कार्यालय नै बगाएकाले सम्पर्कविहीन कर्मचारीको यकिन तथ्यांकसमेत उपलब्ध हुन सकेको छैन । आफन्तहरूले आफ्नै स्तरबाट खोजी तथा उद्धार गर्न अनुमति माग्दा सरकारले अनुमति नदिएको र राज्यले समेत समयमै उद्धार गर्न नसकेको उनको गुनासो छ ।

खरेलका अनुसार उद्धारका लागि हेलिकप्टर उपलब्ध नभएको जानकारी पाएपछि पीडित आफन्तले सोमबार साँझ कम्पनीको कार्यालयमा तोडफोडसमेत गरेका थिए । उनले सगरमाथा उद्धार टोलीलाई हेलिकप्टरसहित परिचालन गर्न सेना प्रमुख र गृह मन्त्रालयका सचिवसँग समेत समन्वय गरेर आफूहरू कम्पनीको कार्यालय पुगेको बताए ।

उनका अनुसार हालसम्म सम्पर्कविहीन ८७ जनाको सूची प्राप्त भएको छ । तीमध्ये करिब ४३ जना आयोजनाको सुरुङभित्रै रहेको जानकारी आएको उनले बताए । सुरुङभित्र ठूलो ढुंगाले बाटो अवरुद्ध गरेको भनिएकाले प्राविधिक टोली परिचालन गर्नुपर्ने र उद्धारका लागि आवश्यक जेनेरेटरको व्यवस्था भइरहेको उनले जानकारी दिए ।

सरकारले मंगलबार मात्रै जलविद्युत् आयोजना निर्माण कम्पनीहरूलाई उद्धार कार्यका लागि अनुमति दिएको जनाइएको छ । रसुवा, नुवाकोट र धादिङमा निर्माणाधीन विभिन्न जलविद्युत् आयोजनामा करिब ९ सय जना सम्पर्कविहीन रहेको बताइएको छ ।

Originally published on abcnews.com.np.