काठमाडौं । नेकपा (एमाले)की सांसद रामकुमारी झाँक्रीले बाढी तथा विपद्बाट प्रभावित नागरिकसम्म सरकार प्रभावकारी रूपमा पुग्न नसकेको आरोप लगाएकी छन्।

मंगलबार सिंहदरबारमा बसेको सर्वदलीय बैठकपछि सञ्चारकर्मीसँग कुरा गर्दै झाँक्रीले सरकारले उद्धार तथा राहतका काममा प्रभावकारी समन्वय गर्न नसकेको बताइन्।

उनका अनुसार सरकारका मन्त्रीहरू सामाजिक सञ्जालमा प्रचारप्रसारमा व्यस्त देखिए पनि विपद्बाट प्रभावित नागरिकले भने सरकार आफ्नो साथमा रहेको अनुभूति गर्न नसकेको अवस्था छ।

झाँक्रीले सामाजिक सञ्जालमा सरकारको गतिविधिको प्रचार बढी भए पनि त्यसले वास्तविक उद्धार तथा राहतको अवस्थालाई प्रतिबिम्बित नगरेको टिप्पणी गरिन्।

उनले भनिन्, “सोसियल मिडियामा भयंकर भिजिबिलिटी छ। सोसियल मिडियाको अल्गोरिदमहरू चुनाव जस्तै हाइपमा छ।”

मन्त्री तथा सांसदहरूले उद्धारमा खटिएको देखाउने तस्बिर र भिडियो सामाजिक सञ्जालमा राख्ने गरेकोप्रति व्यंग्य गर्दै उनले वास्तविक कामभन्दा प्रचारलाई प्राथमिकता दिइएको आरोप लगाइन्।

“कोही सांसदहरूलाई बोकेको फोटो हाल्नुभएको छ, कोही सांसदहरू हेलिकप्टर चढेको सेल्फीको फोटो हाल्नुभएको छ, मन्त्रीहरूले त अर्काको फोटोलाई पनि टनेलभित्र छिरेको भन्दै तानिरहनुभएको छ। अरू के नै गर्नुभएको छ र ?” उनले प्रश्न गरिन्।

सुरक्षाकर्मीको कामको प्रशंसा

यद्यपि, झाँक्रीले विपद्का बेला नेपाली सेना, नेपाल प्रहरी, सशस्त्र प्रहरी र निजामती प्रशासनले गरेको काम प्रशंसायोग्य रहेको बताइन्।

उनले जोखिमपूर्ण अवस्थामा उद्धार तथा राहतमा खटिएका सुरक्षाकर्मी र कर्मचारीले गरिरहेको कामको प्रशंसा गर्दै राज्यका संयन्त्रलाई अझ प्रभावकारी रूपमा परिचालन गर्नुपर्नेमा जोड दिइन्।

विपद् जोखिम न्यूनीकरणमा दीर्घकालीन तयारी आवश्यक

झाँक्रीले जलवायु परिवर्तनका कारण आगामी दिनमा पनि अनावृष्टि, अतिवृष्टि, खडेरीलगायतका प्राकृतिक विपद् दोहोरिन सक्ने भन्दै सरकार र नागरिक दुवैले पूर्वतयारीमा विशेष ध्यान दिनुपर्ने बताइन्।

उनका अनुसार विपद् आएपछि उद्धार र राहतमा मात्र केन्द्रित हुनुको सट्टा विपद् जोखिम न्यूनीकरण, पूर्वसूचना प्रणाली र पूर्वतयारीलाई राज्यको दीर्घकालीन प्राथमिकता बनाउन आवश्यक छ।

एमालेले आफ्नै राहत अभियान चलाइरहेको दाबी

यसैबीच, झाँक्रीले नेकपा (एमाले)ले प्रदेश तथा स्थानीय जनप्रतिनिधिसँग समन्वय गरेर बाढी प्रभावित क्षेत्रमा राहतका कार्यक्रम सञ्चालन गरिरहेको जानकारी दिइन्।

उनले विपद्को समयमा राजनीतिक दल, सरकार, स्थानीय तह तथा नागरिक समाजबीच प्रभावकारी समन्वय आवश्यक रहेको बताइन्।

Originally published on abcnews.com.np.