काठमाडौं । रसुवाको टिमुरेमा फेला परेका ६१ वटा शव मंगलबारसम्म घटनास्थलमै रहेका छन्। हेलिकप्टरमार्फत मात्रै ओसार्नुपर्ने भएकाले ती शव मंगलबार नुवाकोट ल्याउन नसकिएको प्रहरीले जनाएको छ।

मंगलबार मात्रै टिमुरेबाट १२ वटा शव नुवाकोटको त्रिशूली पठाइएको छ। बागमती प्रदेश प्रहरीका अनुसार टिमुरेमा सुरक्षाकर्मीले पुरिएका घर उत्खनन् गरी हालसम्म ९७ वटा शव फेला पारेका छन्। अझै ४० वटा शव उठाउन बाँकी रहेको प्रहरीले जनाएको छ।

मुचुल्का गरिसकिएका २१ वटा शवसमेत टिमुरेमै छन्। अस्पताल नपुर्‍याइएका शवको विवरणसमेत पूर्ण रूपमा अध्यावधिक हुन सकेको छैन।

रसुवामा फेला परेका तीनवटा शव काठमाडौं पठाइएको छ भने पाँचवटा शव यसअघि नै नुवाकोट पठाइएको थियो। बेत्रावतीमा सनाखत भएका तीनवटा शव आफन्तलाई बुझाइएको छ। यसअघि धुन्चे अस्पतालमा १२ वटा शव लगिएको थियो।

यसअघि बाढीले बगाएर नदी तथा आसपासका क्षेत्रमा पुगेका शव मात्रै संकलन गर्दै आएका सुरक्षाकर्मीले सोमबार र मंगलबार भने भत्किएका घर तथा संरचना उत्खनन् गरेर खोजी तीव्र पारेका थिए। त्यसक्रममा ठूलो संख्यामा शव फेला परेका हुन्।

रसुवाका प्रहरी प्रमुख डीएसपी अशोक थापाका अनुसार टिमुरे क्षेत्रमा तीन दिनदेखि लगातार उत्खनन् गरी खोजी गरिएको थियो।

‘तीन दिनदेखि उत्खनन् भइरहेको थियो। ९७ वटा शव फेला परेका छन्। एउटा पहिल्यै आफन्तले पहिचान गरेर लगिसकेका थिए। अब त्यहाँ खोजतलास सकियो भन्ने छ,’ उनले भने।

उनका अनुसार स्याफ्रुबेसीमा ९ वटा र बेत्रावतीमा ११ वटा शव फेला परेका छन्।

सुरक्षाकर्मीले नदी किनार तथा अन्य सम्भावित क्षेत्रमा समेत खोज तथा उद्धार अभियान जारी राखेका छन्।

यसैबीच, रसुवामा सबैभन्दा धेरै मानिस फसेको आशंका गरिएको सुरुङमा पनि खोजी तथा उत्खनन् जारी छ। नेपाली सेनाले विदेशी विज्ञहरूको सहयोगमा सुरुङभित्र फसेकाहरूको खोजी गरिरहेको भए पनि अहिलेसम्म सुरुङको भित्री भागसम्म पुग्न सकेको छैन।

सुरुङभित्र दक्ष जनशक्ति तथा अन्य व्यक्ति फसेको आशंकाका कारण उद्धारका लागि अत्याधुनिक प्रविधि र विशेषज्ञ टोली परिचालन गर्नुपर्ने मागसमेत बढिरहेको छ।

Originally published on abcnews.com.np.